Kurdistaniyên li peytexta Ermenîstanê Êrîvanê ji bo jinên şoreşger ên Kurd Sakîne Cansiz, Fîdan Dogan û Leyla Şaylemez ên ku di 9’ê Çileya 2013’yan de li Parîsê hatibûn qetilkirin, hatin ba hev. Di çalakiyê de êrîşên li ser taxên Kurdan Şêxmeqsûd û Eşrefiyê yên Helebê hatin şermezarkirin.
Di çalakiya bîranînê de Endama Yekîtiya Jinên Azad Viyan Gesenova, şehîdên komkujiya Parîsê bibîr anî û got, “Em vê komkujiya nemerdane careke din bi tundî şermezar dikin û hevrê Sara, Rojbîn û Ronahî bi hurmetî û minetdarî bibîr tînin. Em hevrê Evîn Goyî, Mîr Perwer û Abdurrahman Kizil ên di 23’yê Kanûna 2023’yan de li Parîsê hatibûn qetilkirin jî bibîr tînin. Di 3’yê Çileya 2016’an de li Silopiyayê hevrê Sêvê Demîr, Pakîze Nayir û Fatma Ûyar bi rengekî hovane hatin şehîd kirin. Em van êrîşan careke din şermezar û nelet dikin. Em weke Tevgera Jin ev komkujiyên ku di şexsê wan de li dijî tevgera jinê hatiye kirin bi tundî şermezar dikin û diyar dikin ku dê têkoşîna me bidome.”
Viyan Gesenova, anî ziman ku tevî 13 sal bihurî ne jî dewleta Fransa hê rastiya komkujiyê ronî nekiriye û daxwaza edaletê dubare kir.
Parlamenter Kinyaz Hesenov, jî êrîşên li ser Rojava şermezar kir û got ku hikûmeta demkî ya Sûriyeyê zîhniyeta rejîma Baasê didomîne û li ser navê olê li dijî gel komkujiyan dike. Kinyaz Hesenov, bang li gelê Kurd û partiyên siyasî kir ku destkeftiyên Rojava biparêzin.
Hevserokê Komîteya Kurdistanê Silo Dirboyan, jî diyar kir ku Kurdên li Ermenîstanê dijîn piştgirî didin berxwedana gelê Şêxmeqsûd û Eşrefiyê. Silo Dirboyan, destnîşan kir ku gelê Rojava bi salan e ji bo jiyaneke aram têdikoş in, êrîşên ku bi zîhniyeta DAÎŞ’ê têne kirin şermezar kir û piştgiriya xwe ji bo berxwedana li Rojava û Rojhilat dubare kir.
Çalakiya bîranînê bi dirûşmeyên weke ‘Şehîd namirin’, ‘Jin Jiyan Azadî’, ‘Bijî Berxwedana Şêxmeqsûd’ û ‘Bijî Serok Apo’ bidawî bû.
