Parlamentera Şirnexê ya DEM Partiyê û yek ji parêzerên Rêberê Gelê Kurd Abdullah Ocalan Newroz Ûysal êrişên çeteyên cîhadîst ên li ser gelê Kurd û pozîsyona Tirkiyeyê ji ANF’ê re nirxand.
Newroz Ûysal anî ziman ku êrişa çeteyên HTŞ û SMO ya li Helebê li dijî taxên Kurdan hate kirin, helwesta hikumeta veguhêz a li hemberî îradeya Kurdan radixe pêş çavan.
‘ÊRIŞA LI DIJÎ HERDU TAXAN LI TEVAHIYA SÛRIYEYÊ DIBE SEDEMA ŞER’
Newroz Ûysal destnîşan kir ku ev êriş li dijî gelên Sûriyeyê hemûyan e û got, “Li herdu taxan koçberên ji Efrînê, Kurd, Ereb, Êzidî hene. Destwerdanek li Êzidiyên li wê derê dikare bibe sedem ku li tevahiya Sûriyeyê bibe sedema şer û êrişan. Di heman demê de yên ku qala rêveberiya destûra bingehîn a nû, demokratîk, diyalog û aramiya li Sûriyeyê dikin, nîşan didin bê ji van îdîayan çiqasî ditirsin. Yanî gaveke ku bi temamî cihê fikaran û hêrsê ye. Ji bilî siyaseta giştî dikare şer zêde bike. Lewma em ji nêz ve dişopînin, bi fikar dişopînin.”
Parlamentera Şirnexê her wiha ragihand ku di demekê de ku li Tirkiyeyê pêvajoyek li ser meseleya Kurd heye, destpêkirina van êrişan manîdar e.
‘EGER WÊ BI KURDAN RE AŞTIYEK PÊK WERE, EV YEK DIVÊ YEKPARE BE’
Newroz Ûysal destnîşan kir ku eger wê bi Kurdan re aştiyek pêk were, divê ne tenê bi Kurdên li Tirkiyeyê bi hemû Kurdan re bê kirin û axaftina xwe bi vî rengî dewam kir; “Me timî got, helwesta dewleta Tirkiyeyê ya li ser vê mijarê divê nedurû, ne bi aqlê siyasî yê cuda û ajandayên cuda be. Divê bi aqlekî cidî be. Me timî eşkere kir ku xwişk û biratiya bi Kurdan, aştiya bi Kurdan bi sekn û axaftineke dijberiya li statuya Kurdan a li Rojava, ya li Sûriyeyê nabe, bi helwesta piştgiriya ji bo hêzên leşkerî yên li dijî Kurdan nabe. Dema ku mirov bala xwe bidin ser tabloya 3-4 mehên dawî wê bê dîtin bê mesele çiqasî bi rewşa li Sûriyeyê ve girêdayî ye. Hem dirêjkirina şêweyê kar ê komîsyonê hem jî nîqaşên li ser bicihanîn an jî bicihneanîna Mutabaqata 10’ê Adarê nîşan dide ku ev yek bi bûyerên li Sûriyeyê ve yekser girêdayî ye. Li gel ku me timî destnîşan kir ku rewşa li SÛiryeyê ne li dijî Tirkiyeyê ye lê belê bi kêrî Tirkiyeyê tê, Tirkiye bi peyam û daxuyaniyên xwe bi rengekî sergirtî li gorî ajandaya xwe ya siyaseta bê Kurd, Rojhilata Navîn a bê Kurd dimeşe.”
Parlamenter Newroz Ûysal diyar kir ku gelek kesên niha di nava hikumeta veguhêz de hene li Tirkiyeyê xwendine, ji Tirkiyeyê mûçeyan werdigire, ew kom in ku Tirkiye piştgiriya wan dike û got, “Qala çar koman tê kirin ku êrişî du taxên li Helebê kirin. Ev her çar kom di nava hikumeta veguhêz de wek tabûrên fermandariya giştî bêne nîşandan jî bi kincên xwe, bi şêweyên êrişan, bi nêzîkatiyên îdeolojîk û derdora ku êrişî wan dike nîşan didin ku bi mantiqê DAÎŞ’ê tevdigerin. Ev kom ji xwe bi rengekî eşkere amblemên DAÎŞ’ê bi kincê xwe ve dikin. Ev kom ew kom in ku beriya niha êrişî Durziyan û Elewiyan kiribûn. Eger îro koalîsyona li dijî DAÎŞ’ê li hemberî vê rewşê bêdeng dimîne, mesele ne tenê guhertina nav a vê komê ye. Îro koalîsyona navneteweyî hemû dibêje DAÎŞ nav diguherîne, DAÎŞ maskeyê diguherîne. Vaye maske ev e. DAÎŞ bi xwe van êrişan dike. Ev maske li vir eşkere bû. Bandora Tirkiyeyê ya li van êrişan ne cihê nîqaşê ye.”
Newroz Ûysal bi bîr xist ku wezîrên karên derve yên gelek welatan li dijî êrişên li ser Kurdên li Helebê daxuyanî dan û got, “Lê belê ev yek bi rengê; astengkirina Kurdan lê belê nenaskirina statuya wan nabe. Kurd heta ku bê statu bin, bê nasname bin wê timî li komkujiyan rast bên. Rewşa ku li Rojava diqewime niha ev e. Helwesta li dijî nenaskirinê û bêstatuhiştinê tê cezakirin û dixwazin bi vî rengî peyamekê bidin. Kurd vê peyamê fêhm dikin, lê belê yên ku biryarê li ser têkoşînê bidin wê ew bi xwe bin ku 12-13 sal in li wê derê têdikoşin. Em jî daxuyaniya hêzên li wê derê dixwînin, dibînin. Bang tê kirin ku dewlet û saziyên xwe weke navbeynkar pênase dikin û koalîsyona navneteweyî, pêşî li êrişan bigirin. Kurd li Tirkiyeyê, li Ewropayê, li Rojava, li her derê li ser piyan e. Nepêkane ku tenê li van êrişan temaşe bikin û bêdeng bimînin.”
