Bi sedan kes ji xelkê kantona Reqa, saziyên sivîl, Meclisa Kombûna Jinan a Zenûbiya û Meclisa Malbatên Şehîdan li pêş avahiya Berada Şehîdan a Reqayê kom bûn ku cenaze û wesîqeya şehadetê ya şehîd Miyar El Mirrî radestî malbata wî bikin.
Welatî Miyar Mihemed El Mirîî di 11’ê Çileyê de li bajarê Meskenê yê gundewarê rojavayê kantona Tebqayê di êrişa drona çeteyên hikumeta demkî ya Sûriyeyê de şehîd bûbû.
Merasîma radestkirina cenaze û wesîqeya şehadetê bi deqeyek rêzgirtinê dest pê kir, dûre axaftin li berxwedanê, fedakariyê û şopandina rêça şehîdan hatin kirin.
Endama Nivîsgeha Lihevanînê ya Meclisa Malbatên Şehîdan, Dilgirtî û Gaziyan a kantona Reqayê Emîra El Hesen û hevserokê Meclisa bajarê Reqayê Luey El Îsa axivîn. Di axaftinan de behsa berxwedan û fedakariyên ku gelê Bakur û Rojhilatê Sûriyeyê li dijî astengiyan dane meşandin kir.
Di dawiyê de wesîqeya şehadetê hat xwendin û radestî malbata şehîd hat kirin, ku dûre li goristana Til El Beya ya bakurê rojhilatê Reqayê were veşartin.
