Endama Tevgera Azadiyê Hêlîn Ûmît di hevpeyvîneke taybet a digel televîzyona Medya Haberê de, dersên ku di 13’emîn salvegera qetilkirina Sakîne Cansiz, Fîdan Dogan û Leyla Şaylemez li Parîsê hatine derxistin, plana piştê yên êrîşên li ser taxên Şêxmeqsûd û Eşrefiyê yên Helebê û xwepêşandanên li Îranê nirxand.
Hêlîn Ûmît, bi silavkirina Rêber Apo, gelê Kurd, jinan û temaşevanan dest bi hevpeyvîna xwe kir û bi wesîleya sala nû hêviyên xwe yên demokrasî û aştiyê dubare kir. Ziyad Helep û hevrêyên wî yên ku li Helebê şehîd bibûn bi bîr anî û soza ku daye hemû şehîdan dubare kir.
Hêlîn Ûmît, diyar kir ku komkujiya Parîsê di têkoşîna azadiya Kurdan de cihekî taybet digire û bal kişand ser çalakiyên bîranînê yên ku li Ewropa û li her derê ku Kurd lê dijîn hatin lidarxistin û li ser navê Tevgera Jinan spasiya beşdaran kir. Hêlîn Ûmît, diyar kir ku li dora şehîdan kombûn, şehîdan nemir dike û wateya têkoşînê xurtir dike.
Hêlîn Ûmît, destnîşan kir ku komkujiya Parîsê ne tesadufî bû û hedefgirtina sê jinên pêşeng li Fransa li welatekî di dilê Ewropayê de ku bi gotinên xwe yên azadiyê tê nasîn, êrîşeke bi zanebûn û pirarmanc bû. Hêlîn Ûmît, da zanîn ku komkujî di demekê de ku nîqaşên li ser aştî û çareseriyê çêdibûn de pêk hatiye û destnîşan kir ku îro jî pêvajoyek bi vî rengî heye. Hêlîn Ûmît, anî ziman ku Rêber Apo qetilkirina Sara wekî ‘komkujiya duyemîn a Dersimê’ binav kiriye û got ku ev hewldan li hember pêvajoya aştiyê weke derbeye.
Hêlîn Ûmît, diyar kir ku hevrê Sara yek ji pêşengên ku baweriya wê bi aştiyê mezin bû, ji bo wê kedek mezin raber dikir û got ku hevrê Sara di nava şert û mercên şer ên giran de jî qet baweriya xwe bi jiyana hevpar a gelan winda nekir. Hêlîn Ûmît, destnîşan kir ku armanca komkujiya Parîsê xeta azadiya jinan û perspektîfa aştiyê ya girêdayî Rêbertî hedef girtin bû. Hêlîn Ûmît, da zanîn ku aştî ji şer zehmetir e û got ku ji bo vê hişmendî û berpirsiyariyek cidî hewce dike.
BI HEQÎQETAN RE HEVRÛBÛN Û KOMKUJIYA PARÎSÊ YA DUYEM
Hêlîn Ûmît, behsa komkujiya duyemîn a Parîsê kir û got ku aştiya rastîn bêyî hevrûbûna bi heqîqetê re ne mimkun e. Hêlîn Ûmît, da xuyakirin ku sûcdar û têkiliyên îstîxbaratê yên komkujiya Parîsê hatine eşkerekirin, lê tevî vê hewl tê dayîn ku bê veşartin. Hêlîn Ûmît, anî ziman ku aştiyek rastîn a Tirk-Kurd tenê bi qebûlkirina rastiyê, hevrûbûnê û samîmiyetê dikare were bidestxistin û got ku berevajî vê bawerî di navbera gelan de nikare pêş bikeve.
Hêlîn Ûmît, diyar kir ku Kurd û hemû komên civakî yên ku dixwazin bi azadî bijîn, divê li her derê li ser bingeha xweparastinê xwe birêxistin bikin û rave kir ku xweparastin ne tenê têkoşîna çekdarî ye, di heman demê de rêxistinek bihêz û pergalek jiyanê ye ku dikare xwe biparêze. Hêlîn Ûmît, dibêje ku komkujiya Parîsê di vî warî de dersên cidî vedihewîne û got ku divê kêmasiyên wê bi xwe rexnekirinê bê derbaskirin.
Hêlîn Ûmît, behsa rola pêşeng a hevrê Sara di têkoşîna azadiya jinê de kir û got, “Hevrê Sara temsîla tevgera azadiya jinan bû; ku wê têkoşînên yekem li dijî serdestiya mêr û qalibên kevneşopî yên jinan meşand. Hevrê Sara hem di têkoşînên civakî de û hem jî di têkoşîna xwe de kesayetek mînak bû, bi berxwedan, rêxistin û şerkirinê serketinê hînê jinan dikir. Ez hevrê Sara bi hurmetî, hezkirin û hesret bi bîr tînim.”
2026 SALA ÇARENÛSÊ YE
Hêlîn Ûmît, sala 2026’an wekî “sala çarenûsê” bi nav kir û got ku Kurdan di çaryeka yekem a sedsala 21’an serdema têkoşîneke dijwar li dijî Komploya Navneteweyî meşandine. Hêlîn Ûmît, da zanîn ku tevî planên qirkirin û înkarê, gelê Kurd hebûna xwe parast, daxwazên wan hat dîtin û nasnameyek navneteweyî bi dest xistin.
Hêlîn Ûmît, diyar kir ku guhertina paradîgmatîk a Rêber Apo, Kurdan ji sînorên netew-dewlet derxist ber bi têgeha “neteweya demokratîk” ve bir. Hêlîn Ûmît, destnîşan kir ku netew-dewlet di rastiyê de amûrek îstismarkirinê ye ku li ser sermayeyê disekine û li dijî azadiya gelan e û got ku veguherîna di nav PKK’ê de li ser bingeha vê têgihîştinê pêk hatiye.
Hêlîn Ûmît, sala 2026’an wekî sala têkoşîn, rêxistin û azadiyê ji bo gelan, jinan û Kurdan bi nav kir û diyar kir ku paradîgmaya neteweya demokratîk hêvî û alternatîfek pêşkêş dike.
ÊRÎŞÊN LI HELEBÊ BI ZÎHNIYETA DAÎŞ’Ê HAT KIRIN
Hêlîn Ûmît, êrîşên li Şêxmeqsûd û Eşrefiye yên li Helebê wekî nîşanek ji zihniyeta DAÎŞ’ê bi nav kir û got ku armanca van êrîşan rûmet û kevneşopiya berxwedanê ya gelê Kurd bû. Hêlîn Ûmît şehîd Ziyad Heleb û hevrêyîn wî yên fedaî bi hurmetî bibîr anî û got, “Wekî ewladê wê herêmê bi rastî bi israr li ber xwe da. Ne tenê rûmeta civaka Kurd, ya tevahiya mirovahiyê temsîl kir. Ez hevrêyên wî Denîz, Hawar, Faraşîn, Dilbirîn û Rojbîn bi hurmetî bibîr tînim.”
Hêlîn Ûmît, diyar kir ku ew hewl didin bûyera li Helebê hatiye jiyîn fêm bikin û got ku êrîş ne tenê bûyerek herêmî bûn, bi têkiliyên dewleta Tirk û rejîma Şamê hatine kirin. Hêlîn Ûmît, da zanîn ku armanca van êrîşan lawazkirina Kurdan û pêkanîna polîtîkayek ji bo bêKurdbûnê ye. Hêlîn Ûmît, hovîtiya li dijî şervana jin a li Helebê wekî kiryarek nemirovane bi nav kir û got ku ev yek di nav civaka Kurd de bûye sedema hêrsek mezin.
Hêlîn Ûmît, destnîşan kir ku êrîşan ruhê neteweyî di nav gelê Kurd de xurt kiriye, Kurdên li Başûr, Bakur, Rojava û Ewropayê bertek nîşan dane û ev ruh peyamek ji aliyê din re şandiye. Hêlîn Ûmît, destnîşan kir ku tiştê li Helebê qewimî ne tenê êrîşek li ser Kurdan e, di heman demê de êrîşek li ser gelên cîhanê ye û berxwedanê silav kir.
XWEPÊŞANDANÊN LI ÎRANÊ
Hêlîn Ûmît, diyar kir ku ew xwepêşandanên li Îranê girîng dibîne û destnîşan kir ku bi mîlyonan kes bi daxwazên demokratîk derketine kolanan. Hêlîn Ûmît, da zanîn ku ji ber rejîma Îranê naxwaze guhertin û veguherînê pêk bîne nakokiyên civakî girantir dibin. Hêlîn Ûmît, da xuyakirin ku her çend hêzên derve bandor bikin jî dînamîka esasî jin, ciwan û gel bi xwe ye.
Hêlîn Ûmît, anî ziman ku Îran bi kevneşopiya xwe ya dîrokî ya cihêreng û komên etnîkî û olî yên cuda, ji ber şêwaza jiyana zordar a ku ji hêla rejîma heyî ve tê ferzkirin, bi civaka xwe re di nav aloziyek cidî de. Hêlîn Ûmît, destnîşan kir ku li Îranê demokratîkbûn û avakirina pergalek azad û demokratîk a ku ji hêla gel ve tê rêvebirin hewce ye.
MITÎNGA AZADÎ JI BO RÊBER APO
Hêlîn Ûmît, destnîşan kir ku di vê serdema komkujî û êrîşên dijwar de, ji bo nîşandana hevgirtina civaka Kurd bi Rêber Apo re, pêwîstiya mîtîngek mezin heye û got ji bo vê ew bang li hemû gelên Kurdistanê, bi taybetî gelê Amed û her kesê ku xwedî derfet e kir ku beşdarî mîtîngê bibin. Hêlîn Ûmît, anî ziman ku civaka Kurd di her şert û mercê de li ber xwe daye û têkoşîn meşandiye û got, “Ev mîtîng dê hem ji bo şehîdên Helebê û hem jî ji bo pêşvebirina pêvajoya aştî û civaka demokratîk a ku ji hêla Rêber Apo ve hatiye destpêkirin, gavek girîng be.”
