Li gorî agahiyên hatine bidestxistin, qereqola Milakêrî ya di navbera navenda Şirnex û navçeya Dihê ya Sêrtê de li cerdevanan geriyaye û jê xwestiye ji bo “Rojava” bên qereqolê. Li gorî îdîayê, leşkeran teklîf li cerdevan û ciwanan kiriye ku bi bedela pereyan biçin Rojava û li dijî Kurdan şer bikin.
Hat îdiakirin ku leşkeran, ji ciwanên vexwendine qereqolê re gotiye: “Pere qet bo xwe nekin derd. Mesele ne pere ye. Tenê herin li dijî YPG’ê şer bikin bes e.” Hat zanîn ku cerdevanan jî ev teklîf qebûl nekiriye û li ser vê yekê leşkeran heman teklîf bo ciwanên bêkar kiriye. Hat zanîn ku heman teklîf li Şirnexê jî ji bo gelek gundiyan hatiye kirin.
Li hêla din; hat zanîn ku bi hinceta ku bertek nîşanî qetlîamên HTŞ, DAîŞ û komên paramîlîter ên girêdayî Tirkiyeyê li Rojava dikin dane û parve kirine, li bajarokê Dêrgulê çekên du cerdevanan jê hatine standin.
