– Êrîşên çeteyên HTŞ’ê yên hikûmeta demkî ya Sûriyeyê li ser bajarên Rojava û pêşketinên têkildar wê werin şopandin.
– Çalakiyên ku li Kurdistan, Tirkiye û Ewropayê li dijî êrîşên li Rojava hatine kirin wê werin şopandin.
– Siyasetmedar Gultan Kişanak got ku êrişên li ser Rojava ne tenê li hember hebûna gelê Kurd in, armanc ew e ku jiyana hevpar a gelan ji holê rakin. Û wiha got: “Ev êriş ji bo gelê Kurd pirsgirêka hebûn û tunebûnê ye.”
– Endamê AKPM’ê Andrej Hunko bal kişand ser êrişên li ser Rojava û dorpêça li Kobanê û got ku alîkariyên YE’yê yên ji Şamê re divê bi şertê rawestandina êrişên li ser Rojava û rakirina dorpêça Kobanêyê ve bên girêdan.
– Li Stenbolê, di pêşengiya DEM Partiyê de, roja Yekşemê 1’ê Sibatê li hember êrîşên Rojava li Kadikoyê meşeke girseyî were lidarxistin.
– Serokê EHESS’ê yê yek ji saziyên pêşeng ên zanistên civakî yên Fransayê Romain Huret ragihand ku li hember êrişên li ser Rojava ew di nava piştgiriya bi zanîngehên Rojavayê Kurdistanê de ne.
– Hevseroka TEV-DEM’ê Remziye Mihemed diyar kir ku li hember êrişên li ser Rojava gel di nava berxwedaneke mezin de ye û wiha got: “Ev têkoşîneke hebûnê ye. Em bi jinên xwe, ciwanên xwe û gelê xwe re di berxwedanê de ne. Em ê tu carî paş ve gav neavêjin.”
– Endamê delegasyona Almanyayê ya AKPM’ê û parlementerê Meclisa Federal a Almanyayê yê Partiya Çep (Die Linke) Vinzenz Glaser bal kişand ser êrişên li hember gelê Kurd li Bakur û Rojava û helwesta pasîf a hikûmeta Almanyayê rexne kir.
– Endamê Koma Hristiyan Demokrat a Parlamentoya Ewropayê (PPE) François-Xavier Bellamy bang li welatên Ewropayê kir ku li hember êrişên li ser Rojava ji bo Kurdan bi dengekî û helwesteke bihêz tevbigerin.
