Êrişên HTŞ û çeteyên girêdayî dewleta Tirk li ser Rojava didomin. Gelek Kurd, di nav de zarok jî di van êrişan de jiyana xwe ji dest didin. Li Kobanê ya di bin dorpêçê de av, elektrîk, xwarin û sotemenî nayên peydakirin, krîzeke mirovî ya giran çêdibe.
Diren Can Kaya ji bo ANF’ê rewşa mirovahî ya li Rojava nirxand û wiha got:
“HTŞ û komên girêdayî rêveberiya demkî ya Sûriyeyê pêşî êrişî Elewî û Dûrzîyan kirin, paşê êrişên qirkirinê li ser Kurdan destpê kirin. Jin tên revandin, zarok tên revandin, cenaze tên îşkencekirin, nexweşxane û xebatkarên tenduristiyê tên hedefgirtin, ev hemû binpêkirina Peymana Cenevreyê ne.
Ev şer armanc dike ku şêwaza jiyana hevpar a Şoreşa Rojava û îradeya aştiya herêmî ji holê rake. Av, tenduristî, nexweşxane û binesaziya sivîl tên hedefgirtin; ev yek nîşana niyeta guhertina demografiyê û qirkirinê ye.
Tenduristî ne tenê tunebûna nexweşiyê ye; tenduristî rewşa baş a laşî, ruhî, civakî û siyasî ye. Qutbûna avê, elektrîkê, înternetê û germahiyê rasterast bandorê li tenduristiyê dike.”
Kaya bal kişand ku ev êriş îradeya gel şikandinê û koçberkirinê armanc dike û wiha domand: “Ev gef ne tenê li hemberî Rojava ye, gef li hemû mirovahiyê ye. Cîhan divê vê yekê bibîne.”
‘JI BO ROJAVA DIVÊ KORÎDORA JIYANÎ WERE VEKIRIN
Diren Can Kaya ragihand ku saziyên tenduristiyê yên li Tirkiyeyê li hev civiyane, SES’ê bang li Wezareta Tenduristiyê kiriye û got: “Em amade ne lîsteya xwebexşên xwe parve bikin. Ji vir bang li WHO û hemû saziyên tenduristî û xizmetên civakî yên cîhanê dikin: Em hemû bi hev re ji şer re bêjin bese, ji bo vekirina korîdora jiyanî em bibin dengê gelên Rojava. Em bi berpirsiyariya mirovî û pîşeyî tevbigerin. Banga korîdora jiyanê bi dengekî bilindtir bikin!”
