Endamê Rêveberiya Mafê Mirovan Efrîn-Sûriye Îbrahîm Şêxo li ser rewşa herêma Bakur û Rojhilatê Sûriyeyê ji ANF’ê re axivî. Îbrahîm Şêxo diyar kir ku êrîşên dawî yên li Dêr Hafir, Meskene, Sirîn û Tebqayê ku kampên koçberên Efrînê lê hebû, herêmê ber bi karesatekê ve dibe.
Îbrahîm Şêxo di nav axaftina xwe de diyar kir ku zêdetirî 40 hezar koçberên Efrînê li kampên Tebqayê hebûn û wiha got, “Zêdetirî 40 hezar koçberên ku bi darê zorê ji Efrînê derketiye li kampên Tebqayê hebûn û piraniya wan jin û zarok bûn. Lê neçar man ku careke din ji wan kampên Tebqa û Reqayê jî koçber bibin û berê xwe dan bajarê Qamişlo û Amûdê. Her wiha piştî îdîayên ku wê êrîş ser bajarê Hesekê jî hebin, gelê Hesekê û gelên koçberî Hesekê bûne careke din berê xwe dan herêmên din.”
HEYVA SOR A KURD Û GEL ALÎKARIYÊ DIKIN
Şêxo di berdewamiya axaftina xwe de got ji ber bêdengiya navdewletî rewş aloztir dibe û wiha domand, “Ji bo ku koçber werin bicihkirin hemû dibistan, mizgeft û navendên ku dikevin xizmeta gel hati vekirin. Li aliyê din di nav vê rewşa hewaya sar de pirsgirêka sotemeniyê jî heye. Hemû alîkariyên ku ji bo gelê koçber tên kirin ji înîsiyatîfên gel û herêmî, Heyva Sor a Kurd û alîkariyên ji saziyên Başûrê Kurdistanê ne. Hejmara zêde ya koçberan û zehmetiyên heyî li kêleka wê bêdengiya aliyên navdewletî vê rewşê zehmetir dike.”
‘DIVÊ ALIYÊN VANDEWLETÎ JI VÊ REWŞÊ RE BIBIN BERSIV’
Îbrahîm Şêxo di nav axaftina xwe de eşkere kir ku divê aliyên fermî ên navdewletî ji vê rewşê re bibin bersiv û wiha domand, “Her çiqas li gorî derfetên heyî alîkarî ji bo gelên koçber tên kirin jî divê aliyên navdewletî jî ji vê rewşê re bibin bersiv. Bi taybetî ji bo gelê Efrînê divê li ser dosyeya koçberên Efrînê were sekinandin. Ji ber ji despêka dagirkirina Efrînê ve û heta niha siyaseta koçberkirina bi darê zorê tê meşandin. Her wiha li aliyê din gelê Efrînê yê ku li herêma Şehbayê li ber xwe dan, alîkarî ji aliyên navdewletî ve ji wan re nehate kirin. Niha eynî rewş li herêmên Bakur û Rojhilatê Sûriyeyê jî tê jiyîn.”
‘BI AWAYEKE LEZGÎN PÊDIVIYÊN KOÇBERAN PÊK BÎNIN’
Di dawiya axaftina xwe de Endamê Rêveberiya Mafê Mirovan Efrîn-Sûriye Îbrahîm Şêxo wiha got, “Bêdengiya navdewletî li hember sûc û kiryarên ku tên kirin hevkariyekê di binî re dide xuyakirin. Divê rêxistinên hiqûqî û mirovî yên navdewletî bi erk û berpisyartiyên xwe yên exlaqî û qanûnî rabin û bangên lezgîn ji bo neteweyên yekbûyî bikin ku bi awayeke lezgîn pêdiviyên koçberan pêk bînin. Paşguhkirina van bangan karesateke mirovî ya mezin bi xwe re tîne.”
