Girseya gel li pêşiya navçeyê li hev kom bû, lê belê destûr ji meşê re nehate dayin. Çalakgeran bi dirûşman astengî şermezar kirin. Piştre jî girseya gel li navenda bajêr li hev kom bû û heta ber avahiya DEM Partiyê meşiya.
Di çalakiyê de ku li gel hewldana astengiyê ya polîsan jî pêk hat, Parlamentera Mêrdînê ya DEM Partiyê Salîha Aydenîz axivî, nerazîbûn nîşanî helwesta Walîtiya Mêrdînê û Midûriyeta Emniyetê da û bal kişand ser krîza mirovî û dorpêça li Rojava.
Salîha Aydenîz bi bîr xist ku li Rojava zarok ji ber birçîbûnê û sermayê jiyana xwe ji dest didin û destnîşan kir ku gelê Kurd li çar parçeyan di nava yekîtiyê de ye.
Salîha Aydenîz anî ziman ku wê protestoyên xwe bi rêyên demokratîk dewam bikin û got, felsefeya ‘Jin, Jiyan, Azadî’ û têkoşîna li Rojava ya bi pêşengiya jinan tê meşandin wê bi tenê neyê hiştin.
Salîha Aydenîz got, “Li hemberî Birêz Abdullah Ocalan ku xwediyê vê pêvajoyê ye propaganda reşkirinê tê kirin. Birêz Ocalan çawa ku li Tirkiyeyê mîmarê aştiyê ye li Rojava jî damezrînerê sîstemê ye. Her kes bi vê zane û ji ber vê yekê dest ji polîtîkayên şerê taybet berdin. Ev gel dibêje Birêz Ocalan îradeya wan a siyasî ye. Eger tecrîd hinekî hatibe şikandin ev yek bi saya têkoşîna vî gelî ye. Bi milyonan mirov îro bi yek dilî li gel vê felsefeyê ye.”
