Di çarçoveya seferberiyê ya ji aliiyê Rêveberiya Xweseriya Demokratîk a Bakur û Rojhilatê Sûriyeyê ve li dijî êrîşên çeteyên DAÎŞ-HTŞ û dewleta Tirk hate ragihandin de, welatiyên Başûr, Bakur û Rojhilatê ber bi eniyên Rojava re diçin û tevlî berxwedanê dibin. Ehmed Hêmin Omer bû şehîdê ewil ê seferberiyê.
Ehmed Tahir ê ji Dihokê ku di koma ewil a seferberiyê de cih digre, ji ANF’ê re axivî. Tahir sersaxî ji malbata şehîd Ehmed Hêmin Omer re xwest û diyar kir ku parastina Kurdistanê erkekî neteweyî ye.
Tahir hest û biryardariya xwe bi van gotinan anî ser ziman: “Me cihê xwe di koma ewil a seferberiyê de girt ku ji Başûrê Kurdistanê derbasî Rojava bû. Em bi Ehmed Hêmin re di heman komê de bûn. Ev heval şehîd bû. Em sersaxiyê ji malbat û gelê Başûr û Kurdistanê re dixwazin. Bila serê gelê me sax be. Em ê bibin şopdarê şehîd, wê xwîna wan vala neçe. Başûr, Bakur, Rojhilat an jî vê derê ferq nake, em ji bo parastina xaka Kurdistanê hatin ku yek e. Kurdistan yek dil û yek parçe ye. Divê her Kurdê xwedî rûmet, gel û xaka xwe biparêze. Li ku derê çi zehmetî hebe, em ê li wê derê bin. Ev erkekî neteweyî ye. Em jî wekî welatparêzan, bi dîtina vê erkê hatin vê derê.”
Ehmed Tahir ku piştî axaftina xwe li berê agir nobeta xwe domand, helbestekî ku îşaret bi biryardariya berxwedanê ya gelê Kurd dike, xwend.
