Abdullah Înan ku li Girtîgeha bi Ewlekariya Bilind a Şakranê ya Alîaga ya Îzmîrê dihat ragirtin, piştî 32 salan hate berdan. Înan, ji wir derbasî bajarê xwe Êlihê bû û bi girseyî hate pêşwazîkirin. Endam û rêveberên TUAY-DER’ê, Meclisa Dayikên Aştiyê, nûnerên partiyên siyasî û rêxistinên civaka sivîl û gelek welatî tevlî pêşwazîkirinê bûn.
Hevserokê TUAY-DER’ê Hasan Arigtekîn li vir axivî û xwest ku di serî de Rêber Apo, hemû girtiyên siyasî demildest bên berdan.
Abdullah Înan jî anî ziman ku heke Kurd yekitiya xwe ava bikin dê bikarin her pirsgirêkeke xwe çareser bikin û ev tişt anî ziman: “Heke îro çanda me hebe, divê em xwedî li wê çandê derkevin. Heke em bikevin kêmasiyê û xwedî lê dernekevin, wê demê em ê li hemberî nifşên pêş bikevin şermê. Serok jî her tim behsa jinûveavakirinê dike. Heke em bi destên hev bigirin dê teqez bi ser kevin.”
Abdullah Înan, di sala 1994’an de li Sêrtê hate binçavkirin û di Dadgeha Ewlekariya Dewletê (DGM) de hate darizandin. Dadgehê cezayê muebbetê li Înan birî. Înan, di 32 salên girtîgehê de li gorî rêzê li girtîgehên Sêrt, Amed, Erzirom, Dîlok û Girtîgeha bi Ewlekariya Bilind a Şakranê ya Îzmîrê hate ragirtin.
