Platforma Saziyên Demokratîk, bi wesîleya 21’ê Sibatê Roja Zimanê Dayikê ya Cîhanî li Amedê meşek li dar xist. Hevseroka Giştî ya Partiya Herêmên Demokratîk (DBP( Çîgdem Kiliçgun Ûçar jî beşdarî meşê bû. Di çalakiyê de pankarta bi nivîsa; ‘’Statuya Kurdî perwerdehiya bi Kurdî” hate vekirin û dowîzên bi nivîsên; “Dem dema zimanê Kurdî ye”, “Ez Kurd im, perwerdehiya bi Kurdî dixwazim” û “Azadiya zimanê Kurdî bingeha aştiyê ye” hatin hilgirtin. Her wiha di meşê de gelek caran dirûşmeyên “Ziman rûmeta me ye” û “Bê ziman jiyan nabe” hatin berzkirin. Axaftina destpêkê ya çalakiyê ji aliyê Rifat Ronî ve hate kirin û ev yek anîn ziman: ‘’Kurdî egera hebûna gelê Kurd e. Ji avabûna Komarê ve ye gelê Kurd dixwaze zimanê wan bibe xwedan statu û zimanê perwerdeyê. Heya ku ev daxwaz tê qebûlkirin em ê têkoşîna xwe bidomînin.
Piştre mamosteyê zimanê Kurdî Nûh Bozkûrt teksta çapemeniyê bi Kurdî xwend û bang kir ku statuya Kurdî were naskirin û Kurdî bibe zimanê perwerdeyê.
Hevseroka Giştî ya DBP’ê Çîgdem Kiliçgun Ûçar jî bal kişand ser zextên li ser zimanê Kurdî û bang li dewletê kir ku dawiyê li polîtîkayên xwe yên înkarê bîne û pêngavên qanûnî biavêje û ev yek anîn ziman: ‘’Îro ji bo azadî û pêşeroja zimanan rojeke girîng e. Em dikarin bi hev re êrîşên li ser zimanê Kurdî pûç bikin. Birêz Ocalan tim bal kişandiye ser girîngiya têkoşîna ji bo Kurdî û destnîşan kiriye ku divê di vê mijarê de têkoşîn were meşandin. Zimanê me rûmeta me ye. Zimanê me hebûna me ye.’’
Çalakî li gel govenda hate gerandin, bi dawî bû.
