Îro çiyayên Kurdistanê şahidiya heybet, coş û morala gerîlayên YJA-Starê dike. Pîrozbahiya ku ji hêla gerîlayên YJA-Starê ve di roja 8’ê Adara 2026’an de hat lidarxistin, wekî diruşmeyeke azadiyê xweza û asîmanê Kurdistanê xemiland. Gerîlayên YJA-Starê bi amadekariyên mezin û bi coşeke bilind pîrozbahiya 8’ê Adarê li dar xistin.
Pîrozbahiya ku bi beşdariya Fermandara Biryargeha Navendî ya YJA-Starê Zozan Çewlig li çiyayên Kurdistanê pêk hat, di dîroka azadiya jinên Kurd de bû gaveke nû ya biryardariya azadiya jinên cîhanê. Fermandara Biryargeha Navendî ya YJA-Starê Zozan Çewlig beriya şahiya gerîla dest pê bike, bi hêzên YJA-Starê re civîneke berfireh li dar xist.
Fermandar Zozan Çewlig ji pêvajoya Aşitî û Civaka Demokratîk heya êrişên li ser Rojava, êrişên li ser birdoziya rizgariya jinan, gelek mijarên girîng girtin dest. Nirxandinên ku bi pîrozkirina 8’ê Adarê Roja Jinên Kedkar ên Cîhanê dest pê kirin, li gel biryardariya bilindkirina têkoşîna azadiya jinan berdewam kirin. Fermandara Biryargeha Navendî ya YJA-Starê Zozan Çewlig wiha xîtabî artêşa Star kir:
“Em îro wekî şervanên azadiyê û gerîlayên jin ji bo 8’ê Adarê, bi hev re vê rojê pîroz bikin hatine gel hev. Hemû heval dizanin ku yê ku hişmendiya 8’ê Adarê bi me da nasîn û wateya 8’ê Adarê ji bo me derxist pêşberî dîrokê, Rêber Apo ye. Em berî her tiştî minetdarên Rêber Apo ne. Berî her tiştî em 8’ê Adarê li Rêber Apo pîroz dikin. Em silavên xwe, hezkirinên xwe û girêdanbûyîna xwe ya bêdawî ji bo Rêber Apo dişînin. Bêguman roja 8’ê Adarê bi berxwedana jinan hatiye qezenckirin.
Em di şexsê fermandar û pêşenga xwe rêheval Sara (Sakîne Cansiz) , Besê Anûş , Hanim Yaverkaya, Binevş Agal, rêheval Bêrîtan, Azîme, rêheval Zîlan, Sema Yûce, Zekiye Alkan, Rahşan Demîrel, Bêrîvan û Ronahiyan, fermandara me rêheval Delal, rêheval Armanc, Leyla, Rojîn, Gulçiya, Baharîn, rêheval Edesa, rêheval Berwar, fermandara me ya leheng Emîne Erciyes, rêheval Berfîn Nûrhaq de û dîsa rêhevalên me yên fedaî rêheval Rûken û Sara, rêheval Asya û Rojger, Fîkrî Baygeldî, Mordeman de û heman demê di dîroka herî nêz de di şexsê fedaiyên Şêx Meqsûd rêheval Denîz û Ziyad de, rêheval Faraşîn û Rojbîn de, em careke din tevahî şehîdên xwe yên qehreman û leheng bi rêzdarî bi bîr tînin. Em careke din li hember şehîdên têkoşîna azadiyê bi wesîleya 8’ê Adarê wekî şervanên azadiyê, ji bo ku têkoşîna fedaiyên Kurdistanê, fedaiyên doza azadiyê bi ser bixînin, soza xwe dubare dikin.
Em wekî şervanên azadiyê yên Tevgera Azadiya Jinan, bêguman di pêşengtî û Rêbertiya Rêber Apo de em ê li mîrateya 8’ê Adarê xwedî derkevin. Jixwe em xwe wekî mîrateya wan dibînin. Em xwe wekî berdewama berxwedana 8’ê Adarê dibînin. Em ne tenê bi navê jinên Kurd, bi navê tevahî jinan îro pêşberî dîrokê ne û em bi navê tevahî jinan ji pergala desthilatdar hesab dixwazin. Tevahî hêzên desthilatdar wekî kujerên klasîk, tevahî gelan dikin nava şer, bi îmha û înkarê re rû bi rû dihêlin.
Em îro di şerê cîhanê yê sêyemîn de ne. Di pêvajoyeke wisa de me salek li dû xwe hişt. Rêber Apo li hember siyaseta şer, di 27’ê Sibatê de bi navê ‘Aşitî û Civaka Demokratîk’ bangawaziyeke dîrokî kir. Ev bangawaziya dîrokî saleke xwe tije kir. Li hember tarîtî û şerê dagirkeriyê, ji bo gelê Kurd, ji bo tevahî jinan, ji bo gelê herêmê ev pêngava Rêber Apo careke din bû hêviyeke mezin. Li hember vê tarîtiyê bû ronahiyek, bû hêviyek. Pêvajoya ku em niha tê de derbas dibin, em wekî hêzên parastinê ji nêz ve pêşketinan dişopînin. Di vê pêvajoya dîrokî de, pêşengtî û nirxê ku têkoşîna azadiya jinê derxistiye holê, em di vê îddîayê de ne ku em vê mîrateya ku hebûn û nasnameyek ava kiriye, em ê her tim zêdetir bi ruhê ‘Jin Jiyan Azadî’ û bi têkoşîna xwe bibin serketinê. Em vê îddîayê nîşan didin.
Em dibêjin: ‘Bijî Têkoşîna Azadiya Jinan û Şoreşa Jinan,
Bijî Neteweya Demokratîk,
Şehîd Namirin,
Jin Jiyan Azadî,
Bijî Rêber Apo!’”
