AMED: Xizmên Windayan û Şaxa Komeleya Mafên Mirovan (ÎHD) a Amedê, di hefteya 892’yemîn a çalakiya xwe ya “Bila Winda bên dîtin, kujer bên darizandin” de li ber Bîrdariya Mafê Jiyanê ya li Parka Koşûyolûyê ya navçeya Rezanê ya Amedê kom bûn û daxuyanî dan. Xizmên Windayan, parazvanên mafên mirovan, endam û rêveberên DFG’ê, saziyên sivîl ên civakî beşdarî daxuyaniyê bûn. Xizmên Windayan wêneyên kesên ku hatine windakirin û di binçavkirinê de hatine kuştin hilgirtin. Di çalakiya vê hefteyê de aqûbeta nûçegihanê Rojnameya Ozgur Gundemê Nazim Babaoglû yê di 12’ê Adara 1994’an de piştî ku li navçeya Sêwregê hate revandin û ji wê rojê ve agahî jê nayên girtin, hat pirsîn.
ÊLIH: Şaxa Komeleya Mafên Mirovan (ÎHD) a Êlihê û Malbatên Windayan di hefteya 728’emîn de çalakiya xwe ya bi navê “Bila winda bên dîtin, kujer bên darizandin” li ber Bîrdariya Mafên Mirovan a Cadeya Gulistanê lidar xist. Di çalakiyê de rêveberên ÎHD’ê û Xizmên Windayan û gelek kes amade bûn û wêneyên kesên ku di binçavkirinê de hatine windakirin û kuştin hilgirtin. ÎHD’ê û Malbatên Windayan vê hefteyê qala Komkujiya Helebceyê kirin û qurbaniyên komkujiyê bi bîr anîn. Dû re rêveberê Şaxa ÎHD a Êlihê Huseyîn Elçî metnê ku qala Komkujiya Helebceyê dikir xwend. Çalakî bi deqîqeyekê çalakiya rûniştinê bi dawî bû.
GEVER: Çalakiya ku ji hêla Şaxa Komeleya Mafên Mirovan (ÎHD) û xizmên windayan ve li navçeya Gever a Colemêrgê hat lidar xistin, di hefteya 218’emîn de berdewam kir. Di çalakiya vê hefteyê de aqûbeta Nûrettîn Tûrgût ê ku di sala 1993’yan de hatibû binçavkirin û binçavkirina wî hat înkarkirin, hat pirsîn. Di çalakiya li Kolana Hunerê hatî lidar xistin de wêneyên kesên di binçavan de hatine windakirin, hatin hilgirtin. Daxuyanî ji hêla Berdevkê Komîsyona Windayan a ÎHD’ê Eren Baskin ve hat xwendin. Eren, diyar kir ku ew di hefteya 218’an de ji bo Nûrettîn Tûrgût ku binçavkirina wî hatiye înkarkirin, hatine ba hev.
