Newroza ku îsal bi dirûşma “Newroza Azadî û Yekîtiya Demokratîk” li Amedê hate pîrozkirin, hem ji kêliyên dîrokî hem jî ji peyamên girîng re şahidî kir. Li gel baranê jî ji 7 heta 70 salî gelek kes tevlî bûn û cejn bi coşeke mezin hate pîrozkirin. Baweriya gela bi têkoşînê û hêviya ji pêvajoyê careke din hate nîşandan.
Bi sed hezaran kesî li gel polîtîkayên êriş, provokasyon û qexeyan jî agirê Newrozê îsal bi coşeke hîn mezintir geş kirin û ji Qada Newroz Parkê isara gelê Kurd a li ser aştî û azadiyê careke din nîşanî cîhanê dan. Yekîtiya neteweyî, rakirina tecrîdê, berdana girtiyan, avêtina gavên hiqûqî têkildarî pêvajoyê û hêviyên gelê Kurd ên ji bo aştiyê di pîrozbahiyê de mijarên li pêş bûn.
LI GEL QEDEXE Û ASTENGIYAN JÎ BI STRANAN KETIN QADÊ
Serê sibehê welatî ji pênc deriyên hatin danîn ketin qada Newrozê. Girseya gel du saetan zû li qadê li hev civiyan û li ber dahol û zirneyê govend gerandin. Saet di 10:00 de jî ji bendên kontrolê yên polîsan derbas bûn û ketin qadê.
Jinên ku bi kincên xwe yên gelêrî bi dirûşman derbasî nava qadê bûn bi kincên xwe yên rengîn qad xemilandin. Mêran jî bi şal û şapikên li xwe kirî derbasî qadê bûn.
Li gel ku biryareke qedexeyê nebû jî kesên ku kincên gelêrî li xwe kiribûn û dixwestin bi şalên kesk, sor û zer derbasî nava qadê bibin, hatin astengkirin. Ciwanan nerazîbûn nîşanî qedexeyê dan. Dayikek ku qedexe nas nekir, çenteyê xwe nîşan da û got, “Ew hezar carî qedexe bikin, ez ê hezar carên din veşêrim û bikevim qadê.” Her wiha gelek ciwan jî ji aliyê polîsan ve hatin binçavkirin.
Piştî ketina gel a li qadê, girseya gel bi strana bi strana ‘Rehşan’ a Agirê Jiyan hate pêşwazîkirin. Di destê beşdarana de flamayên ji wêneyên Rêber Apo hebûn.
LI QADÊ COŞA JIN Û CIWANAN
Li Newrozê ku coş her kêlî zêde bû, li gel baranê jî govend hate gerandin. Tevlîbûna zêde ya ciwanan bal kişand.
Ciwanên ku bi kincên neteweyî tevlî bûn tim û tim dirûşma ‘Bijî Serok Apo’ qîriyan. Her kêliya ji qadê nîşaneya îrade û hêviya gel bû.
Li qada ku dayikan bi rengê kesk, sor û zer xemilandibûn, bi taybetî govenda jin ên koçer coş zêde kir. Di Newrozê de ku jin ên ciwan jî gelekî tevlî bûn, reng û coşa wê hêjayî dîtibû. Pîrozbahî bû yek ji pîrozbahiyên Newrozê yên herî qelebalix ên salên dawî.
DAXWAZA JI BO AZADIYÊ ERD Û EZMAN HEJAND
Li beşeke meizn a kulûbeyên li qadê posterên mezin ên Rêber Apo hatin daliqandin. Li gel posteran gel al hilda û li her nuqteya qadê wêneyên Rêber Apo bilind kir. Ciwanên ku xwestin li pêşiya pankartan wêne bikişînin ketin rêzên dirêj.
Bi axaftin û dirûşman daxwaza bidawîkirina tecrîdê û pêkhatina azadiya Rêber Apo hate kirin. Welatiyan bi yek dengî dirûşm avêtin, li gel daxwaza azadiyê her wiha israra xwe ya di mijara aştiyê de tim û tim destnîşan kirin.
Tevî gel, siyasetmedarên ku li pîrozbahiyê axivîn bal kişandin ser daxwaza statuyê ya gelê Kurd û ji bo azadiya Rêber Apo bang kirin. Her wiha işaret bi girîngiya pêvajoyê hate kirin.
Welatiyan ku di hevpeyvînên xwe yên ji bo çapemeniyê de ragihandin ku pêvajo firsendek e, anîn ziman ku divê ev firsend ji aliyê herdu aliyan ve bê nirxandin. Li gel vê yekê hêvî û baweriya xwe ya bi Îmraliyê û pêvajoya aştiyê anîn ziman û peyam dan dijberên pêvajoyê.
BANGA YEÎTIYA NETEWEYÎ YA DEMOKRATÎK HATE DUBAREKIRIN
Dayikan li dora êgir bi rûkenî tilîlî kirin, ciwanan jî ji bo geşkirina agirê Newrozê bi rengekî kevneşop çakêtê xwe avêtin nava agir. Coşa pîrozbahiyê bi stranên hunermendan hîn geş bû.
Hunermendên ji çar aliyên Kurdistanê hatin hem bi stranên xwe hem jî bi axaftina xwe bal kişandin ser yekîtiya neteweyî û yekbûna gelê Kurd. Bi vê bangê re girseya gel dirûşma “Yek e, yek e, yek e gelê Kurd yek e” qîriya.
Siyasetmedaran jî heman bang dubare kirin, bi taybetî bal kişandin ser girîngiya yekîtiya gelê Kurd a di vê pêvajoya bi rîsk û şer de ya li çar parçeyên Kurdistanê.
LI GEL BARAN Û HERIYÊ GOVEND NESEKINÎ
Piştî axaftinan Agirê Jiyan derkete ser dikê û gel li salên 1990’î vegeriya. Li gel baranê jî govend hate gerandin. Girseya gel guh neda heriyê û bi komê re stran got.
Axaftina Çetîn Arkaş ku piştî 33 salên girtîmayinê hate berdan, bandoreke mezin li girseya gel kir.
‘EM Ê TEKEZ BI SER BIKEVIN’
Çetîn Arkaş axaftina xwe bi van gotinan bi dawî kir: “Her canekî ku me ji dest da, ewladên herî bijarte û bedew ên vî gelî bûn. Ewladê we bû. Niha wan canan di govenda xwe de, di dirûşmên xwe de, di nava têkoşîna xwe de hîs bikin. Me soz dane wan. Em soz didin wan û dayikên hêja hemûyan: Em ê bi ser bikevin. Em ê tekez bi ser bikevin.”
Girseya gel ku bi dirûşman serê sibehê kete qada pîrozbahiya Newrozê, êvarê bi strana “Çerxa Şoreşê” ji qadê çû.
Newroza Amedê ya 2026’an: Her kêlî, her reng, her coş û her rûyê tevlî bûn ji bo serketina gelê Kurd a sedan sal in berdêlan dide, hêvî careke din mezin.
