Rojnamevan Nûjiyan Erhan di dema Fermana 3’yê Tebaxê de xwe gihandibû Şengalê û bi kamera û pênûsa xwe bûbû dengê Êzidiyan û bi taybet jî jinên Êzidî. Hîm û sazîbûna Ragihandina Azad li Şengalê danî.
Dema çeteyên Roj yên ser bi PDK’ê 3’yê Adarê xwestin êrişê Şengalê bikin, girseya gel û jinên Êzidî ji bo bertek nîşan bidin û rê nedin derbasê Şengalê bibin meşiyan. Lê çeteyên Roj bi çekê bersiva bertekên gel da û yekser rojnamevan û jinên Êzidî hedef girtin. Rojnamevan Nûjiyan Erhan ku çalakiyê dişopand bû hedefa êrişa çeteyên Roj û giran birîndar bû. Tevî hemû hewldanan jî Nûjiyan Erhan piştî têkoşîna bi rojan di 22’yê Adarê de li nexweşxaneyeke Rojavayê Kurdistanê şehîd bû.
Cenazeyê şehîd Nûjiyan li şehîdgeha Şehîd Dilgeş û Şehîd Berxwedan a çiyayê Şengalê hate definkirin.
Îro endamên ragihandina azad a Şengalê û jinên Êzidî serdana gora wê kirin, gul danîn ser tirba wê û daxuyanî hate dayîn.
Daxuyaniya Ragihandina Jinên Êzidî ji aliyê Hêvîdar Şengalî ve hate xwendin.
Berfirehiya daxuyaniyê wiha ye; “Em di serî de şoreşger û rojnamevana çapemeniya Azad Rêheval Nûjiyan Erhan bibîr tînin. Em di şexsê hevrêya xwe Nûjiyan de şehîdên berxwedana Xanesorê, Şehîdên Çapemeniya Azad û Şehîdên 74 Fermana bibîr tînin. Em soz didin ku emê heta dawî li ser xeta çapemeniya azad bi rihê Nûjiyanan tekoşîna heqîqetê bidomînin.
Em di 9’emîn salvegera şehadeta hevrê Nûjiyan de ne. Rêheval Nûjiyan, bi kesayeta xwe ya şoreşgerî, bi ked û xebata xwe di dilê me û civaka me de ciheke taybet ava kir. Di dema fermanê de ji çiyayên Azad berê xwe da Şengalê. Bi pênûs û kamera xwe rastiya fermanê ji dinyayê re ragihand. Ji bo ku bibe dengê êş, birîn û berxwedana jin, zarok û dayîkên me di rêya serxistina heqîqetê de meşiya.
Îro navê bi sedan zarokên Êzidxanê Nûjiyane. Em ragihandina jin, li ser xeta Rojnamegeriya Azad a ku bi rastiya Nûjiyanan ava bûye tekoşîna heqîqetê dimeşînin. Me li ser rastiya Nûjiyan xwe birêxistin kir û weke ragihandina jinên Êzidî xwe ava kiriye. Hevrê Nûjiyan bû ronahiya heqîqetê. Bû keça çiyayê Şengalê û rojnamevana xaka pîroz a Êzidxanê.
Rojnamevan û hevrêya me Nûjiyan di sala 2017’an de dema ku di şerê xiyanetê de heqîqeta berxwedêran dişopand hate hedef girtin û şehîd bû. Beriya niha bi 9 salan di berxwedana Xanesorê ya li dijî Pêşmergeyên Roj ên girêdayî PDK’ê Rojnamevan Nûjiyan şehîd bû. Emê tû carî yên ku rêheval Nûjiyan hedef girtin û şehîd xistin ji bîr nekin û nedin ji bîr kirin.
Di roja îro de careke din xeteriyên mezin li ser civaka me hene. Divê em weke ragihandina azad a şengalê, weke Rojnamevan Nûjiyan xwedî li kar û xebatên xwe derkevin û plangeriyên li ser civaka me têne kirin eşkere bikin û bibin dengê civaka xwe.
Em careke din hevrêya xwe û Rojnamevana Çapemeniya Azad bi rêz û hûrmet bibîr tînin û soza me daye şehîdên rêya heqîqetê dubare dikin. Bi vê bîr û baweriyê em dibêjin; em ê heta dawî li ser şopa heqîqetê, bi rihê Nûjiyanan tekoşîna azadiyê bimeşînin. Bi pênûs û kemara Nûjiyan heqîqeta jinên Êzidî bi jiyana azad bihûnin.”
