21’ê Adarê ji bo gelên bindest bû sembola destpêkek nû. Şeva di navbera 20 û 21’ê Adarê de, dema ku Kawayê Hesinkar li dijî Dehaq serî hilda û agirê azadiyê pêxist, ev roj kir sembola berxwedan û rizgariyê. Gelê Kurd, wekî beşek ji vê berxwedanê, agirê Newrozê tevî berdêlên giran her tim geş kirin. Mazlûm Dogan bi çalakiya xwe ya li zindana Amedê ev kevneşopî domand û ji aliyê Rêber Apo ve wekî “Kawayê Nûjen” hate binavkirin. Her wiha ewladên gelê Kurd şoreşgerên pêşeng Sema Yuce, Rahşan, Ronahî û Bêrîvan jî ev kevneşopiya berxwedanê bi agirê bedena xwe domandin.
Gerîlayên azadiya Kurdistanê Aram Hêvî û Cûdî Ereb, ku li ser şopa van qehremanan têkoşîna xwe didomînin, li ser girîngiya Newrozê axivîn.
LI GEL HEMÛ QEDEXEYAN, GEL DEV JI TÊKOŞÎNA XWE BERNEDA Û XWEDÎ LI NEWROZÊ DERKET
Gerîla Aram Hêvî, ewil Newroza Rêber Apo û gel pîroz kir û diyar kir ku Newroz ji bo gelê Kurd xwedî girîngiyek mezin e. Aram Hêvî, anî ziman ku berxwedana ku ji hêla Kawayê Hesinkar ve hatî dest pê kirin ji hêla Mazlûm Dogan ve hatiye berdewam kirin. Aram Hêvî, diyar kir ku gelê Kurd bi berxwedanê hebûna xwe parastiye û got ku tevî zext û qedexeyan jî, xwedî li Newroz hatiye derketin. Aram Hêvî, destnîşan kir ku têkoşîna azadiyê bi fedakariya şehîdan mezin bûye û ev giyan îro jî berdewam dike. Aram Hêvî got, “Weke gerîlayên azadiya Kurdistanê, em ê di sala 2026’an de Newrozê veguherînin Newroza azadiya Rêber Apo. Em bi vê yekê bawer dikin. Gelê me wê bi giyana Mazlûman, Semayan, Bêrîvan û Ronahiyan xwedî li Rêber Apo derkevin û bi coşeke mezin Newrozê pêşwazî bikin.”
NEWROZ YEKÎTIYA GELÊN ROJHILATA NAVÎN E
Şervanê HPG’ê yê Ereb Cûdî Ereb, jî da xuyakirin ku Newroz rojek berxwedan û têkoşînê ye. Cûdî Ereb, diyar kir ku agirê Newrozê xwedî girîngiyeke dîrokî ye û got ku Mazlûm Dogan û yên din bi vî agirî têkoşîna azadiyê geş kirine. Cûdî Ereb, destnîşan kir ku Newroz yekîtiya gelan temsîl dike û got ku divê Kurd, Ereb, Tirkmen û gelên din li ser bingeha wekheviyê li hev kom bibin. Cûdî Ereb, Newroza hemû gelan pîroz kir û diyar kir ku têkoşîna azadiyê dê berdewam bike.
