Meclisa Malbatên Şehîdan a Tirbespiyê merasîma cenaze ya şervanê QSD`ê şehîd Egîd Cemal (Miseb Mihemed) ku 20`ê Çileya 2026`an li Reqayê şehîd bûbû, li Pakrewangeha Şehîd Dilşêr a li gundê Dugir li dar xist.
Merasîmê bi rêzgirtinê dest pê kir, paşê rêveberê Meclisa Malbatên Şehîdan a Herêma Cizîrê Mihemed Cemîl axivî û got di hundirê şoreşa Rojavayê Kurdistanê de bi dehan kesî ji bo azadiya gel canê xwe feda kiriye.
Mihmed Cemîl diyar kir ku kesên ku dixwest gelê Kurd tune bikin negihaştin wê armanca xwe û got bi saya şehîdên mîna şehîd Egîd û hevalên wî, Kurdan serî rakir û biryara berxwedanê da.
Endama Partiya Yekitiya Demokratîk (PYD) Ayhan Murad jî destnîşan kir ku dê xwedî li nirxên şehîdên xwe derkevin û got: “Egîd ji bo me şehîd bû. Divê em li keda wî xwedî derkevin.”
Ayhan da zanîn ku her çi qas êrişên giran li ser Rojava werin kirin, lê îradeya gel ji êrişan mezintir e û wiha dawî li axaftina xwe anî. “Gelê me biryar daye ku li kêleka şervanên xwe bisekine û welatê xwe biparêze. Em soza xwe bi tevahî şehîdan û melbatên şehîdan re nû dikin ku em ê şopdarên rêya şehîdan bin.”
Ji endamên Meclisa Leşkerî ya Tirbespiyê Dilbirîn Ferho jî got: “Em wekî hêzên parastinê dê her dem gelê xwe ji her êrişan biparêzin, me soz daya bi dehan hevalên me yên şehîd ku em li ser şopa wan bin hetanî dawiyê. Cardin soza xwe nû dikin û dibêjin çi ji me were xwestin ji bo gelê me bi aramî jiyana xwe bidomîne em ê bikin.”
Piştî axaftinan nasnameya şehîd Egîd Cemal hat xwendin û radestî malbatê hat kirin. Di dawiya merasîmê de cenazeyê şehîd bi dirûşman spartin axê.
Meclisa Malbatên Şehîdan a Tirbespiyê 2`yê Sibatê (2026) merasîma xiyabî ya şehîd Egîd Cemal li dar xisitibû.
