Amadekariyên 4’ê Nîsanê ku tê hêvîkirin îsal bi coşeke mezin bê pîrozkirin, dest pê kirin. Di dawiya bernameya ku dê bi meş, festîval, konser û daxuyaniyan derbas bibe de, bi deh hezaran kesên ku dê li Xelfetiyê kom bibin, ber bi gundê Amarayê ve bimeşin. Gelê ku daxwaza aştiyê, civaka demokratîk û azadiya fîzîkî ya Rêber Apo dike, mîna 22 salên dawî, dê her cure astengî û qedexeyan bide ber çavan û biçe Amarayê. Yek ji van navan jî Meryem Soylu ya 65 salî ye. Meryem Soylu ya ku ewil ji Stenbolê û piştre ji Amedê beşdarî bernameyên Amarayê bû, di dema 9 salên ku li girtîgehê ma de jî tevî lêpirsînan 4’ê Nîsanê bi daxwaza Aştî û azadiyê pîroz kir.
Meryem Soylu ya ku di vê pêvajoyê de 3 zarokên xwe di şer de winda kirine, nekarî xwe bigihîne cenazeyên du zarokên xwe û ji ber ku di girtîgehê de bû nekarî beşdarî cenazeyê zarokekî xwe bibe. Soylu ya ku bi salan e ji bo mirinên zêdetir neyên jiyîn û aştî ava bibe têdikoşe, ji salên 2000’î ve beşdarî pîrozbahiyên li Amarayê dibe. Soylu ya ku di dema li Stenbolê dijiya ji wir dihat Xelfetiyê û piştre jî ji Amedê beşdarî van çalakiyan dibû, ewilî 4’ê Nîsanê pîroz kir. Soylu bal kişand ser wê yekê ku divê pîrozbahiyên îsal bibin wesîleya aştî û demokrasiyê û destnîşan kir ku heta sala par jî çûyîna wan a gund dihat astengkirin.
TEVÎ DESTWERDANAN ME GAV BI PAŞ VE NEAVÊT
Soylu diyar kir ku nêzî 20 sal in heman astengî û destwerdan berdewam dikin û behsa pîrozbahiyên 4’ê Nîsana 2011’an kir ku qet ji bîr nake. Got ku wê demê xwestine bi malbata xwe re ji Stenbolê biçin Amarayê lê rastî destwerdaneke mezin hatine. Soylu got, “Wê demê her sal bi hezaran kes li ketina navçeyê kom dibûn. Destûr nedidan ku mirov bikevin navçeyê jî. Wê rojê bêyî ti hincetekê destwerdan li me kirin. Em birîndar bûn, em hatin binçavkirin lê em qet newestiyan. Îsal jî em ê bi heman biryardariyê biçin û heman daxwazên xwe bînin ziman. Tevî temenê xwe, em ê wekî dayikan li refên herî pêş bin. Mîna 20 sal berê, îsal jî em ê li ber zextan serî natewînin.”
ME LI GIRTÎGEHÊ JÎ HEMAN BIRYARDARÎ Û TÊKOŞÎN MEŞAND
Meryem Soylu da zanîn ku wê demê gelek kes birîndar bûn, jiyana xwe ji dest dan û hatin binçavkirin, lê girse belav nebû û anî ziman ku ew ê îsal jî bi heman daxwazan bikevin rê. Soylu diyar kir ku ew dest ji daxwazên azadiyê bernadin û wiha got: “Heta par jî destwerdan kirin. Em ê ji bo aştiyê, ji bo hêviya jiyana hevpar û yekîtiyê bikevin rê. Tenê dema ku min 9 salan di girtîgehê de derbas kir, ez nekarîm biçim Amarayê. Wê demê em ne li Amarayê bûn lê me di girtîgehê de 4’ê Nîsanê pîroz dikir. Tevî her cure astengî, serdegirtin û lêpirsînan, me ew roj pîroz dikir. Dihatin ser qewîşên me digirtin, hevalên me diavêtin şaneyan lê me mîna derve bi heman biryardariyê li ber xwe dida.”
EM Ê BI DAXWAZÊN AŞTÎ Û AZADIYÊ BIKEVIN RÊ
Soylu, bang li hemû gel kir ku beşdarî meşa Gemlikê û bernameya Amarayê ya ku dê bi heman daxwazan bidin destpêkirin bibin û herî dawî wiha got: “Nêzî 20 sal in em di her pîrozbahiyê de çûn Amarayê. Roja ku em neçûne wir tune bû. Em dixwazin ev pêvajoya hatiye destpêkirin ji bo gelan bi ser bikeve û aştî pêk were. Divê dewlet êdî gavekê biavêje. Di vê pêvajoya pêş dikeve de, bila dewlet jî mîna gelê Kurd bi vîn û biryardarî polîtîkayan bimeşîne. Em naxwazin tu kes bimire. Îsal jî mîna 20 salên dawî, em ê careke din bibêjin aştî û biçin Amarayê. Em dixwazin rêberiya me azad bibe, êdî divê ew azad bibe. Ev pêvajo vê yekê dixwaze. Divê her kesê ku dixwaze dengê daxwaza aştiyê bide bihîstin, îsal beşdarî vê meşê û pîrozbahiyan bibe. Ev gel çi dibe bila bibe dê dest ji daxwazên xwe bernede.”
