Nivîskar û lêkolîner Adil Osman bi wesîleya 4’ê Nîsanê roja rojbûna Rêber Apo axivî û destnîşan kir ku ev roj tenê rojbûnek nîne, di heman demê de ji bo têkoşîna gelê Kurd û mirovahiyê xaleke werçerxê ye.
‘4’Ê NÎSANÊ ROJBÛNA PARADÎGMAYEKÊ YE’
Adil Osman di destpêka axaftina xwe de diyar kir ku roja rojbûna Rêber Apo ji bo her Kurdekê bi wate ye û got, rojbûna Rêber Apo rojbûna paradîgmayeke siyasî û fikrekî nû ye û di dîroka gelê Kurd û mirovahiyê de werçerxeke mezin e.
Adil Osman diyar kir ku Rêber Apo ji bo çêbûna zanebûna siyasî û neteweyî ya Kurdan bi roleke pêşeng rabû û got, “Di dîroka Kurdan de rêberên ku di vê astê de bi zane kirine, pir kêm hatine.”
‘FIKRÊ NETEWA DEMOKRATÎK JI BO PIRSGIRÊKÊN HERÊMÊ ÇARESERÎ YE’
Adil Osman diyar kir ku Rojhilata Navîn di nava şer û krîzeke mezin de ye, ev rewş çavkaniya xwe ji sîstemên dewletparêz û ferasetên hegemonîk digire. Osman destnîşan kir ku çareseriya rast a vê krîzê, fikrê “netewa demokratîk” e.
‘TEVLÎ TÊKOŞÎNA DEMOKRATÎK BIBIN’
Adil Osman bang li gelê Kurd û rewşenbîran kir ku bi hurmet nêzî fikrên Rêber Apo bibin, fêm bikin û tevlî têkoşîna demokratîk bibin.
Osman bal kişand ser girîngiya yekîtiya neteweyî û ev tişt got, 4’ê Nîsanê tenê bîranîna rojbûna kesekî nîne, di heman demê de têkoşîna azadî, demokrasî û yekîtiya neteweyî ya gelê Kurd hatiye nûkirin û ev feraset bi navê Rêber Apo re bûye yek.
