Ji bo endamê Yekîneyên Parastina Sivîlan (YPS) Abdullah Elma (Cûdî Feraşîn) ku di dema qedexeya derketina kolanan a Şirnexê de jiyana xwe ji des dabû, li navçeya Silopiyayê şîn hate danîn. Şîna Elma, bi pêşengtiya MEBYA-DER û bi beşdariya nûnerên partiyên siyasî, rêxistinên civaka sivîl û gelek welatiyan bi girseyî hate ziyaretkirin. Şîn, li Taxa Ofîsê hate danî û girseya li devereke nêzî mala malbata Elma kom bû, heta cihê şînê bi dirûşma “Şehîd namirin” meş li dar xist.
Hevserokê MEBYA-DER’a Şirnexê Ramazan Togrul sersaxî ji bo malbatê xwest. Wekîla DEM Partiyê Newroz Uysal Aslanê jî got ku di têkoşîna azadiyê ya gelê Kurd de gelek bedelên giran hatin dayin, her kesên jiyana xwe ji dest dan berpirsyartiya wan zêdetir kir û got: “Divê em ji her demê bêhtir têbikoşin.”
‘ŞEHÎDÊN ME BINGEHA TÊKOŞÎNA ME NE’
Bi domdarî Newroz Uysal Aslanê di şexsê Abdullah Elma de hemû kesên di têkoşîna azadiyê ya gelê Kurd de jiyana xwe ji dest dane bi bîr anî û axaftina xwe wiha qedand: “Azadiya gelê Kurd ji bo xeta sor e. Rêberê Gelê Kurd Abdullah Ocalan got ku êdî çek hatine terikandin û têkoşîna xwe bi siyaseta demokratîk mezin bikin. Qonaxa îro, encama têkoşîna şehîdan e. Hewceye em tifaqa xwe ji hemû deman bêhtir mezin bikin. Heta Rêberê Gelê Kurd Abdullah Ocalan azad dibe jî em ê vê têkoşînê mezin bikin. Şehîd, bingeha têkoşîna me ne.”
Serdan, bi kirina duayan bi dawî bû.
