Hevserokên Giştî yên Partiya Wekhevî û Demokrasiyê ya Gelan (DEM Partî) Tulay Hatîmogûllari û Tuncer Bakirhan û Serokê Giştî yê CHP’ê Ozgur Ozel piştî hevdîtinê daxuyaniya hevpar dan.
Ji ewil Ozgur Ozel axivî û got sedema hevdîtina wan geşedanên li hundir û derveyî welat in. Ozel, diyar kir ku bi destê darazê mudaxile li CHP’ê tê kirin, li ser vê mijarê, bandorên siyasî û aborî yê şerê li dijî Îranê, tevdîrên ji bo dema nêz û dirêj ên hewceye Tirkiye bigire û hwd. axivîne. Ozel, got ku tu serkeftiyên şer nînin.
Di berdewamê de Ozel bal kişand ser pêvajoya Aştî û Civaka Demokratîk û îşaret bi xalên 6 û 7’an ên di raporê de kir. Ozel, da zanîn ku dê di rojên pêş de bi Serokê Meclisê Nûman Kurtulmuş re hevdîtinê bike û dê di hevdîtinê de bendewariyên têkildarî van xalan û gavên hewceye bên avêtin jê re bibêje.
Ozel, bi domdarî got êrişeke giran li ser CHP’ê heye û operasyonên li dijî şaredariyan bi bîr xist. Ozel, anî ziman ku ji bo sindoqê deynin pêşiya gel çi ji destê wan were dê bikin û di vê mijarê de berpirsyartiyeke mezin dikeve ser milê Serokê Meclisê. Ozel, got ku ji bo hilbijartina navberê hemû şert û merc guncav in û divê serokê Meclisê peywira xwe bicih bîne.
ROJA ROJNAMEVANÊN HATINE QETILKIRIN
Tulay Hatîmogûllari bal kişand ser Roja Rojnamevanên Hatine Qetilkirin û got ku gelek rojnamegerên serî netewandin li vê xakê hatine qetilkirin û di şexsê Mûsa Anter, Metîn Goktepe, Gurbetellî Ersoz, Hrant Dînk, Nazim Daştan û Cîhan Bîlgîn de hemû rojnamegerên hatine qetilkirin bi bîr anî.
Tulay Hatîmogûllariyê behsa krîza aborî ya li Tirkiyeyê kir û da zanîn ku mirov ji birçan û xizaniyê dimirin, zarok birçî radizên û rewşa li Tirkiyeyê raxist ber çavan. Tulay Hatîmogûllariyê, got ku şerê li dijî Îranê ev krîza aborî hêj kûrtir kiriye û wiha pê de çû: “Şer tenê bi Îranê re bisînor nema. Niha li Lubnanê jî didome. Dixwazin Iraqê û welatên derdorê jî tev li şer bikin. Anku dora me xelekeke ji agir e. Hewceye li dijî vê tevdîrên herêmî û kûrewî bên girtin. Divê îktîdara Tirkiyeyê ji bo bidawîkirina şer her derfetan bi kar bîne.”
Tulay Hatîmogûllari got ku di demeke li dinyayê şer heyî de li Tirkiyeyê zextên giran li ser muxalefetê tên kirin û got: “Di vê krîz û qiyametê de îktîdar bi rêya darazê bi qelskirina muxalefetê mijûl e. Krîza darazê krîza demokrasiyê ye. Divê kesên hilbijartî negirtî bên darizandin. Di serî de Ekrem Îmamoglû, divê hemû şaredar bên berdan. Divê qeyûm ji holê rabin û şaredar vegerin ser peywira xwe. Tevî biryara AYM û DMME’yê jî Can Atalay hêj girtî ye. Ev sûc e. Ev, tunehesibandina îradeya gel e û binpêkirina mafê bijartin û hilbijartinê ye. Opasyonên sîstematîk ên li dijî şaredariyên CHP’ê hiqûqî nînin, siyasî ne. Ji destpêkê heta niha em li dijî vê ne.”
Di berdewamê de Tulay Hatîmogûllar da zanîn ku di hevdîtinê de li ser Pêvajoya Aştî û Civaka Demokratîk jî axivîne û wiha axivî: “Me gelek caran got pêvajoyê hêdî dimeşînin û pêş naxin. Belê komîsyonek hate avakirin û rapora xwe pêşkeşî Meclisê kir. Niha dora verastkirinên zagonî û hiqûqî ye. Divê bi lezgînî li ser komeqanûnan bixebitin, li ser zagonên çarçoveyê bisekinin. Lê di vê mijarê de hêj jî tu gavên şênber nehatine avêtin. Bêguman îktîdar û şirîkê wê ji vê rewşê berpirsyar in. Piraniya Meclisê di destê wan de ye û dikarin zagonan bînin û pêşiya wê vekin. Em careke din bang li îktîdar û aqilê dewletê dikin ku li gorî geşedanên pêvajoyên li Îranê nêzî pêvajoyê bibin.”
Tulay Hatîmogûllari got serketina pêvajoyê girêdayî helwesta hevpar a hemû partiyên siyasî û kirdeyên civakê ye û ji ber piştgiriya didin spasiya CHP’ê kir. Tulay Hatîmogûllariyê, diyar kir ku hewceye pêvajoyê pêştir bixin û wiha pê de çû: “Ji bo verastkirinên zagonî yên pêwîst bên çêkirin, ji bo avêtina gavên demokratîkbûnê hewceye em tevek destê xwe deynin bin kevir.”
