Li Dewletên Yekbûyî yên Emerîkayê (DYE), 85 endamên Meclîsa Nûneran ên Demokrat xwestin, pêvajoya dûrxistina Serok Donald Trump a ji wezîfeyê bê destpêkirin, yan jî xala 25’emîn a Destûra Bingehîn bi cih bê anîn.
Nîqaş ji ber daxuyaniyên dawî yên Trump ên li dijî Îranê destpê kir. Trump li ser platforma medya dîjîtal Truth Social di parvekirina xwe de gef li Îranê xwaribû û gotibû, wê temamiya şaristaniyê tine bike. Beriya niha jî sixêf li rêveberiya Tehranê kiribû û gotinên giran bi kar anî bû.
Ev gotin hem li nava raya giştî ya navneteweyî hem jî li nava siyaeta DYE’yê bû sedema nerazîbûneke tund.
‘KONTROLA XWE WINDA KIR’
Siyasetmedarên Demokrat îdîa kirin ku ev daxuyaniyên Trump ne tenê ji aliyê dîplomatîk ve, her wiha ji aliyê têrkariya xwe ya fikrî ve jî cihê fikaran e.
Senator Jack Reed ji bo Trump got, “Xuya ye kontrola xwe winda kiriye”, endama Meclîsa Nûneran Alexandria Ocasio-Cortez jî îdîa kir ku rewşa mejî ya serok “Di hilweşînê” de ye.
Gotinên Trump ji aliyê Sekreterê Giştî yê Neteweyên Yekbûyî Antonio Guterres ve jî hate şermezarkirin.
LI ENIYA KOMARGERAN JÎ NÊRÎNÊN CUDA RÛ DAN
Rexneyê li Trump ne tenê li nava Demokratan hebû. Marjorie Taylor Greene ku yek ji kesayetên nêzî Trump e, nerazîbûneke tund nîşan da.
Greene got, “Bombeyeke bi tenê jî li Emerîkayê neket. Em nikarin şaristaniyekê bi temamî tine bikin. Ev yek şeytanî û dînîtî ye.” Lewma jî xwest, li hemberî Trump xala 25’emîn bi cih bê anîn.
Ev gotin işaretê bi aciziya Komargeran a li hemberî gotinên Trump dike.
Li gorî xala 25’emîn a Destûra Bingehîn a DYE’yê, eger bê tespîtkirin ku serok nikare wezîfeya xwe pêk bîne, ferz dike ku erkên serok radestî alîkarê serok bê kirin.
Lê belê di halê hazir de ji ber ku kabîneya heyî ji kesayetên dilsozê Trump pêk tê, zehmet e ku ev rê bê hilbijartin.
