Meclisa Malbatên Şehîdan a bajarê Qamişloyê ji bo şervanên Hêzên Sûriyeya Demokratîk (QSD) Mihemed Şehab El Remîd, Ednan Xidir El Remîd, Mihemed El Mihemed Mirî Neamê, Heza Misari El Mihemed, Şeîb, Çiyager Armanc, Can Polat, Aram Qamişlo, Rohat Raco, Diyar Qamişlo û şervanên Yekîneyên Parastina Jin (YPJ) Zeyneb Mihemed, Hêzil Arjîn, Hêzil Tolhildan ku di êrişên çeteyên dewleta Tirk û hêzên hikûmeta demkî ya Şamê yên di navbera 6-29’ê Çileyê de li herêmên Bakur û Rojhilatê Sûriyeyê şehîd bûne, merasîmek li dar xist.
Şehîd Diyar Qamişlo, Çiyager Armanc, Zeyneb Mihemed, Hêzil Arjîn, Mihemed El Mihemed Mirî Neamê hatin oxirkirin û ji şehîd Mihemed Şehab El Remîd, Ednan Xidir El Remîd, Heza Misari El Mihemed, Şeîb, Can Polat, Aram Qamişlo, Rohat Raco û Hêzil Tolhildan re merasîma xiyabî hat çêkirin.
Merasîm bi beşdariya bi hezaran kesî li Pakrawangeha Şehîd Delîl Saruxan pêk hat. Di merasîmê de wêneyên şehîdan, alên Yekîneyên Parastina Gel (YPG) û YPJ’ê hatin daliqandin.
Merasîm bi kêliyek rêzgirtina ji bo giyanê şehîdan dest pê kir.
Li ser navê Meclisa Malbatên Şehîdan Ubeyd Etê axivî û got: “13 çeleng ji bo rûmet û axa vî gelî biparêzin canê xwe dan. Em di kesayeta van hevalan de tevahî şehîdên azadiyê bi bîr tînin. Vî gelê ku nirxê şehîdan danîne ser milê xwe, dê berdêlên giran bidin. Çand û exlaqê me ew bû me birîndarên wan derman dikir, girtiyên wan bi cih dikir, me her tiştê xwe bi wan re parve kiribû. Ji ber ku newêrek bûn nekarîn sing bi sing şer bikin bi komployan hevalên me şehîd kirin. Êdî tank, top û balafir nikarin vîna van dayîkan bişkînin.”
‘EM Ê ÇEKÊN HEVALÊN XWE LI ERDÊ NEHÊLIN’
Li ser navê hêzên leşkerî Baz Dêrik axivî. Baz Dêrik sersaxî ji malbatên şehîdan, gelê Kurd û Rêber Apo re xwest û wiha got: “Em soza xwe ya bi şehîdan re dubare dikin. Ey şehîd em ê heta dawî li ser şopa we bin. Em ji gelê xwe re dibêjin ked, xwîn û xwena hevalan bû mîsogeriya mafên me. Hemû hevalên me dema şehîd bûn di vê berweriyê de bûn ku dê heval û gelê wan çeka wan li erdê nehêlin. Em soz didin em çeka wan li erdê nahêlin.”
Li ser navê Kongra Îslama Demokratîk Şêx Emer Qaderi axivî û wiha got: “Yên ku canê xwe di ber axa xwe de bide şehîd e. Bi keda wan hûn îro dikarin rihet razên. Hûn ne tenê di dilê me de zindî ne hûn li gel Xweda jî zindî ne. Bila malbatên şehîdan xemgîn nebin, ev ji bo wan zindîbûnek e.”
Piştî axaftinan bawernameyên şehîdan hatin xwendin û pêşkêşî malbatên wan hatin kirin.
Li ser navê malbata şehîd Diyar Qamişo Şervan Mehmûd, li ser navê malbata şehîd Aram Qamişlo Huseyîn Xelef, li ser navê malbata şehîd Hêzil Tolhildan Elî Menan, li ser navê malbata şehîd Haza Mihemed Zagros Hat û li ser navê malbata şehîd Hêzil Arjîn Melek Elî axivî.
Malbatan sersaxî ji gel re xwest û diyar kirin ku ew bi şehîdên xwe serbilind in û dê heta dawî şopa şehîdan bidomîn in.
Piştî axaftinan cenazeyên şehîdan hatin veşartin.
