Daxuyaniya Hevserokatiya Konseya Rêveber a KCK’ê wiha ye:
“Em 1’ê Gulanê roja hevgirtin û têkoşînê li hemû kedkar, jin, ciwan û gelan pîroz dikin. Di serî de kedkar, jin, ciwanan û têkoşîna hemû gelên li dijî modernîteya kapîtalîst û hêzên zordar bi coşa 1’ê Gulanê silav dikin. Di serî de şehîdên 1’ê Gulana 1977’an û hemû şehîdên ku 1’ê Gulanê anîne vê rojê bi minetdarî û rêzdarî bi bîr tînin.
Li Tirkiye û Bakurê Kurdistanê bi pêvajoya aştî û civaka demokratîk re em dikevin 1’ê Gulanê. Lê li Rojhilata Navîn jî em di nava dijwariya Şerê Cîhanê yê Sêyemîn ku herêm ji hêla siyasî ve ji nû ve tê dîzaynkirin de dikevin 1’ê Gulanê. Tê dîtin ku şerê li Rojhilata Navîn û cîhanê di sala 2026’an de wê piralî be. Pêşeroja Tirkiye û Kurdistanê bi rewşa pêvajoya aştî û civaka demokratîk û Şerê Cîhanê yê Sêyemîn ve girêdayî be. Bê guman wê têkoşîna gelên me diyarker be. Êdî hêzên hegemonîk bi tena serê xwe nikarin hevsengiya siyasî ya cîhanê û Rojhilata Navîn diyar bikin. Em di nava serdemeke ku pêşeroja mirovahiyê, hem li cîhanê û hem jî li Rojhilata Navîn wê ji hêla têkoşîna gelan ve were destnîşankirin de ne. Em ji vê re dibêjin dema gelan.
Gelê Kurd êdî ne Kurdên 100 sal berê ye. Bi taybetî bi têkoşîna xwe ya 50 salên dawî, di serî de li Bakurê Kurdistanê, li her çar parçeyên Kurdistanê û li derveyî welat Kurdan hêzek siyasî û civakî ya girîng bi dest xistine. Êdî rastiya civaka Kurd a rêxistinkirî heye. Bi vê yekê re gihîştine hêzek ku bandorê li pêşketinên siyasî yên li Rojhilata Navîn dike.
Gelê Kurd bi hêzek rêxistinî û siyasî ya wiha 1’ê Gulanê pêşwazî dike. Gelê Kurd bi têgihîştina xwişk-biratiya gelan û bi pêşxistina xeta neteweya demokratîk a ku di ruhê 1’ê Gulanê de ye, armanc dike ku Tirkiyeyek demokratîk û Rojhilata Navîn a demokratîk biafirîne. Ji bo çareseriya demokratîk a pirsgirêka Kurd, demokratîkbûnê girîng dibînin. Rêber Apo bi vê têgihîştinê di 27’ê Sibata 2025’an de Banga Aştî û Civaka Demokratîk kir û rêça pêkanîna Tirkiyeyek demokratîk destnîşan kir. Banga 27’ê Sibatê ji bo çareserkirina pirsgirêka Kurd û demokratîkbûna Tirkiyeyê ye. Muxatabê vê bangê ne tenê gelê Kurd e; di heman de gelên Tirkiyeyê ne. Di vî alî de, hêzên demokratîk ên Tirkiyeyê jî berpirsiyar in ku ji bo serkeftina bernameya aştî û civaka demokratîk bixebitin.
Divê 1’ê Gulana 2026’an bibe rojeke ku gelê Kurd û hemû hêzên demokratîk ên li Tirkiyeyê ji bo demokratîkbûna Tirkiyeyê helwestek hevpar nîşan bidin û têbikoşin. Ji bo vê jî divê 1’ê Gulana 2026’an bibe platformek ku xwedî li Banga Aştî û Civaka Demokratîk were derketin û îradeyek hevpar a têkoşînê derxîne holê.
Têkoşîna aştî û civaka demokratîk di heman demê de têkoşîna sosyalîzma demokratîk e. Rêber Apo Banga Aştî û Civaka Demokratîk bi têgihîştina sosyalîst a demokratîk kir. Xeta sosyalîzma demokratîk hişt ku Rêber Apo bangek wiha bike. Rêber Apo dixwaze nirxên ruhê 1ê Gulanê; bi têgihîştina sosyalîzma demokratîk û Banga Aştî û Civaka Demokratîk jiyanî bike.
1’ê Gulana 2026’an ji bo gelên Tirkiyeyê derfetek dîrokî ye. Hemû hêzên demokratîk ên Tirkiyeyê bi gelê Kurd re li qadên 1’ê Gulanê xwedî li bernameya aştî û civaka demokratîk a ku armanca wê çareserkirina pirsgirêka Kurd û demokratîkbûna Tirkiyeyê ye, derkevin û heke îradeya têkoşîna hevpar were nîşandan wê 1’ê Gulana 2026’an wekî rojeke ku demokrasî û azadî misoger kiriye, bikeve dîrokê.
Ji bo vê em bang li hemû Kurdan dikin ku bi ruhê Newrozê bi gelên Tirkiyeyê re qadên 1’ê Gulanê tijî bikin û alaya têkoşînê ya ku sosyalîzma civaka demokratîk misoger kiriye, bilind bikin.
Bijî 1’ê Gulanê!
Bijî Xwişk-Biratî û Têkoşîna Hevpar a Gelan!
Bijî Sosyalîzma Civaka Demokratîk!”
