Wezareta Tenduristiyê ya Lubnanê da zanîn ku di encama êrîşên dawîn ên Îsraîlê yên li ser başûrê welêt de 9 kesan jiyana xwe ji dest dane û 23 kes jî birîndar bûne. Hate ragihandin ku ji kesên ku jiyana xwe ji dest dane du jê zarok in û pênc jî jin in.
Êrîş tevî agirbesta ku di 17’ê Nîsanê de kete meriyetê hatin kirin. Serokkomarê Lubnanê Joseph Aoun diyar kir ku Îsraîl agirbestê binpê dike û rewşa berbehs bi gotinên tund rexne kir.
ÊRÎŞÊN DRONE Û TOPAN
Li bajarê Şehabiye yê li başûrê welêt (herêma Sur/Tir) balafireke bêmirov motorsiklêtek hedef girt û di encamê de du kesan jiyana xwe ji dest dan.
Her wiha li bajarê Nabatiye li ser goristanek êrîşeke bi droneyê hat kirin. Bajarokê Kunin li Bint Jbeil jî hate topbarankirin.
SEROKKOMAR BINPÊKIRINAN ŞERMEZAR KIR
Serokkomar Aoun, êrîşan şermezar kir û got ku Îsraîl sivîl û karmendên bijîşkî hedef digire. Aoun, diyar kir ku ev binpêkirina qanûna navneteweyî ye.
Aoun, bang li civaka navneteweyî kir ku zextê li Îsraîlê bike û da xuyakirin ku êrîş tevî agirbestê jî berdewam dikin û qurbanî zêde dibin.
Serokkomarê Libnanê, her wiha destnîşan kir ku pêwîst e xebatkarên tenduristiyê û dildar werin parastin.
Hat ragihandin ku Serokê Dewletên Yekbûyî yên Emerîkayê Donald Trump, ji Îsraîlê xwestiye ku êrîş li ser hedefên teqezkirî pêk bîne. Medyaya Îsraîlê her wiha nivîsand ku ji artêşê hatiye xwestin ku xwînsar tevbigerin.
