Rêxistina Mafê Mirovan a HRANA ragihand ku du jin li bajarên Zencan û Yezîdê bêyî fermana dadwer hatine binçavkirin û agahî ji wan nayê girtin.
Di raporê de hat diyarkirin ku jinek li bajarê Zencana Îranê, bi hinceta ‘belavkirina bûyerên navxweyî yên Îranê û şandina wan ji bo medya muxalefetê û medyaya biyanî’, ji aliyê hêzên Wezareta Îtîlaatê ve bêyî biryara dadgehê hatiye binçavkirin. Piştre vîdyoya “îtirafên bi zorê” ya wê jinê di medya û medya dijîtal de hat belavkirin, lê nayê zanîn ku ew îtiraf di bin çi cure zext û êşkenceyê de hatine girtin.
HRANA da zanîn ku jinek din a bi navê Flura Semedanî ku Behayî ye, li bajarê Yezîdê ji aliyê hêzên ewlehiyê yên rejîma Îranê ve bêyî fermana dadwer hat binçavkirin. Heya niha çarenûsa wê nediyare û ev yek bûye sedema fikarên mezin ji bo malbata wê.
Hêjayî gotinê ye ku binçavkirinên xwepêşanderan li seranserê Îranê, bi taybet çalakvan û azadîxwazên jin zêde bûye û di rewşeke xirab û nediyar de, di bin zextê de tên ragirtin. Ragirtina girtiyên siyasî di hucreyên yek kesî de, tevlîkirina wan bi girtiyên sûcên giştî re, dayîna cezayên giran û nebûna edaleta dadger fikarên navneteweyî zêdetir kirine.
Her wiha rêxistinên mafên mirovan hişyarî didin ku neheqî û gendelî di hundirê girtîgeha Yezîdê de zêde bûye. Tê gotin pereyên ku bi navê ‘alîkariya ji bo azadkirina jinan’ tên komkirin, ji bo armancên din ên nediyar tên xerckirin.
