Şervanên Hêzên Komandos ên girêdayî QSD’ê Abdullah El Namis, Mihemed Hisên û Heydera Salih El Xedûr 18’ê Çileya îsal li bajarokê Kerama yê Reqayê şehîd bûne, îro bi merasîmekê li Pakrewangeha Şehîd Dijwar a li gundê Dawudiyê yê bajarê Hesekê hatin veşartin.
Merasîma ku bi sedan kes tev lê bûn, ji aliyê Meclisa Malbatên Şehîdan ve hat organîzekirin.
Piştî deqeya rêzgirtinê endama Meclisa Malbatên Şehîdan Xilûd Xelef axivî û ev tişt got “Em li beramberî mezinahiyekê sekinîne ku bi gotinan nayê pîvan. Em behsa şehadetê dikin. Şehîd bi giyanê xwe bar dikin, lê her timî zindî ne û li pey xwe wateyên fedakarî û dilsoziyê dihêlin.”
Endamê Komîteya Têkiliyan a Hêzên Komandos Serdar Şikakî jî seraxî ji şervanan û malbatên şehîdan re xwest û got, şehîdan wateyên herî mezin ên berxwedana parastina gel, xak û destkeftiyan nîşan da.
Serdar Şikakî diyar kir ku berxwedan dê heya bidestxistina azadiyê û parastina rûmeta gelan bidomîne.
Bi navê Meclisa Rûspiyên Hesekê Ekrem Mehşûş jî di merasîmê de axivî û got: “Zêdetirî 14 sal e em şehîdan didin. Di serdama rejîma berê de me şehîd dan. Piştre me li hemberî hêzên tarî yên wekî El Nusra û DAIŞ’ê şer kir û me şehîd dan. Lê mixabin îro em di serdema hikumeta nû de jî. Mixabin em dibêjin Sûriyeyî bi destê Sûriyeyî tên şehîdxistin.”
Mehşûş di dewama axaftina de bal kişand ser mijara dîlgirtiyan û got: “Şervanên me li gel hikumeta demkî tên dîlgirtin. Hikumet ji bûyerên ku li welat rû didin li ku derê ye? Ew ji yekê berpirsyar e. Ji bo rizgarkirina xaka xwe em amade ne berdêl û şehîdan bidin.”
Piştî axaftinan wesîqeyên şehîdan hatin xwendin û radestî malbatên wan hatin kirin.
Di dawiya merasîmê de cenazeyên şehîdan bi dirûşmên “Şehîd namirin” hatin veşartin.
