Navenda Çand û Hunerê û tevgera Hîlala Zêrîn ên bajarê Kobanê îro merasîmeke bîranînê ji bo salvegera 34`emîn a şehadeta hunermend Gurbet Aydin (Mizgîn) li dar xist.
Di merasîma bîranînê de bi dehan endamên rêxistinên jinan û rêxistinên civaka sivîl û hunermend amade bûn.
Di merasîmê de sînevîzyonek der barê jiyana şehîd Mizgîn û rola wê ya di hunera kurdî de hate pêşandan.
Rêvebera Tevgera Hîlala Zêrîn a Kobanê Gulçîn Qasim Hiso anî ziman ku ew di salvegera şehîd Mizgîn de, hemû şehîdên azadiyê bi bîr tînin û wiha got: “Şehîd Mizgîn roleke xwe ya girîng û biwate di hunerê de hebû. Ew bi hemû hezkirin û hêvî karê hunerê dikir û bi riha hunerê azadî ji cîhanê re da nîşandan. Divê em jî şopdarên rêya şehîd Mizgîn bin û xeta ku wê dabû pêşiya xwe em li ser wê xetê bimeşin û temam bikin.”
Di dawiya merasîmê de Koma Bozan a Navenda Çand û Hunerê ya Kobanê stran pêşkêş kirin.
