AMED: Xizmên Windayan û Şaxa Komeleya Mafên Mirovan (ÎHD) a Amedê li ber Bîrdariya Mafê Jiyanê ya Parka Koşûyolûyê ya navçeya Rezan a Amedê di hefteya 900’emîn de çalakiya xwe ya “Bila winda bên dîtin û faîl bên darizandin” li dar xistin. Di çalakiyê de wêneyên kesên di bin çavan de hatine windakirin û qetilkirin hatin hilgirtin û aqûbeta Îkram Îpek, Servet Îpek û Seyîthan Yolûr ên ku di 18’ê Gulana 1994’an de li gundikê Gomak ê girêdayî gundê Tûralli ji aliyê leşker û parêzvanan ve hatin binçavkirin û piştre bi tu awayî agahî jê nehate standin, hate pirsîn.
ÊLIH: Li Êlihê jî çalakî di hefteya xwe ya 737’emîn de li pêşiya Bîrdariya Mafê Mirovan a li ser Cadeya Gulistanê hate lidarxistin. Di çalakiyê de aqûbeta Abdulcelîl Kaçar û hevalên wî yên ku di 17’ê Gulana 1994’an de li navenda Sêrtê piştî ku hatin binçavkirin ji aliyê ‘’hêzên ewlehiyê’’ ve ew birin Newala Qesaban û li wir hatin qetilkirin, hate pirsîn.
RIHA: Şaxa Rihayê ya ÎHD’ê çalakiya xwe ya ku bi şîara ‘’Bila winda werin dîtin û faîl werin darizandin’’ di hefteya 74’emîn de jî li dar xist. Çalakî li navçeya Xelîliyeyê li pêşiya Novada Parkê hate lidarxistin û pankarta ku wêneyê kesên winda li ser hate hilgirtin. Vê hefteyê çîroka Adnan Bagca hate parvekirin û daxuyanî ji aliyê endamê ÎHD’ê Baver Gul ve hate xwendin.
COLEMÊRG: Li navçeya Gever a Colemêrgê jî çalakiya ji bo windayan tê lidarxistin di hefteya xwe ya 227’emîn de berdewam kir. Daxuyanî li Kolana Hunerê hate dayîn û pankarta bi nivîsa ‘’Bila winda bên dîtin, faîl werin darizandin’’ hate vekirin. Di çalakiya vê hefteyê de ji bo Mehmet Işik û Mahîr Duşunmez ên ku di sala 1994’an de dema di bin çavan de bi êşkenceyê hatin qetilkirin daxwaza edaletê hate kirin.
