Li dijî operasyonên darazê yên li ser Partiya Gel a Komarê (CHP) û biryara bêhukmiya teqez, li gelek bajaran çalakiyên protestoyî û daxuyaniyên çapemeniyê hatin lidarxistin. Rêxistinên ked û demokrasiyê û nûnerên partiyên siyasî destnîşan kirin ku ev biryar destwerdanek e li dijî siyaseta demokratîk.
Li Îzmirê, Hêzên Ked û Demokrasiyê yên Îzmirê li ber Navenda Çandê ya Tirkan Saylan daxuyaniyek dan çapemeniyê. Di çalakiyê de pankarta “Biryara bêhukmiya teqez nayê pejirandin” hat vekirin û dirûşmên Li dijî faşîzmê mil bi mil” hatin berzkirin. Sefa Yilmaz ê ku daxuyanî xwend, diyar kir ku otorîterbûn li welat kûrtir dibe û got: “Biryara bêhukmiya teqez, ragihandina ji holê rakirina qada siyaseta demokratîk e. Piştî daxuyaniyê, girse ber bi Avahiya CHPê ya Îzmirê ve meşiya.
Li Edeneyê jî, Platforma Ked û Demokrasiyê ya Edeneyê li Parka Înonu civiyan. Mihemed Çelîk li ser navê platformê axivî û diyar kir ku ev biryar darbeyek e li ser vîna gel û bang kir ku dawî li desteserkirina qeyûman bê anîn.
Piştî çalakiyê, Anil Tanburoglu li ber Serokatiya CHP’ê ya Edeneyê ji girseyê re axivî û got ku ev biryar ne tenê bandorê li CHPê, lê bandorê li hemû pêvajoyên demokratîk ên li Tirkiyeyê dike. Ehmed Karagoz jî anî ziman ku desthilatdarî di nav krîza aborî û xizaniyê de hewl dide bi pêkanînên antîdemokratîk rewşa xwe biparêze. Yakup Ataş jî bal kişand ser rêveberiya otorîter a ji sala 2016’an û vir ve û got: “Di pêvajoyek ku behsa aştiyê tê kirin de, biryarên bi vê rengî zirarê didin aştiya civakî.
Li Xetayê jî, ji aliyê Serokatiya CHP’ê ya navçeya Îskenderûnê ve daxuyaniyek hat dayîn û bertek nîşanî biryara “bêhukmiya teqez” hat dayîn. Huseyin Derîn ê ku teksta çapemeniyê xwend, got: Em ê li hemberî wê hişmendiya ku darazê wekî gefê bi kar tîne serî netewînin.
