Meclisa Malbatên Şehîdan li Til Temorê bi daxuyaniyekê hewldanên hikûmeta demkî ya Sûriyeyê ji bo guhertina navên hin dibistanên ku navên şehîdên herêmê li wan hetiye kirin, şermezar kir.
Daxuyanî li Parka Şehîdan ji aliyê Hevseroka Meclisa Malbatên Şehîdan li Til Temerê, Çinar El Yûsif ve, bi amadebûna malbatên şehîdan, şêniyên bajêr û nûnerên saziyên sivîl hate xwendin.
Di daxuyaniyê de hat gotin ku “navên şehîdan ne tenê peyvên ku li ser dibistan û saziyan hatine nivîsandin in, lê belê bîrdanka gelekî ne û nîşana qurbaniyên kesên ku jiyana xwe ji bo parastina ax, azadî û rûmetê dane ye.”
Her wiha diyar kir ku ev nav ji bo bîranîna mîrata şehîdan hatine hilbijartin.
Di daxuyaniyê de hat gotin ku her hewldanek ji bo guhertina navên şehîdan êrişek e li ser bîrdanka civakê û wijdanê malbatên şehîdan e, û hat destnîşankirin ku şehîd ne tenê kes bûn, lê sembolên neteweyî û mirovî bûn ku dê di dilê gel de bimînin.
Malbatên şehîdan di daxuyaniya xwe de bang li rayedarên peywendîdar kir ku rêzgirtinê ji bo îradeya malbatên şehîdan û hestên civakê bigrin, û ji wan xwest ku ji van biryarên xwe vegerin.
Çalakiya malbatên şehîdan bi dirûşmeya “Şehîd nemir in” bi dawî bû.
