Ji bo diyarkirina nûnerên Meclîsa Gel li bajarên Hesekê, Qamişlo û Kobanê pêvajoya hilbijartinê îro dewam kir. Di çarçoveya pêvajoyê de ku ji aliyê komîsyonên hilbijartinê yên beriya niha hatibûn avakirin ve tê meşandin, li navendên destnîşankirî dengdan tê kirin.
Salona civînê ya li avahiya rêveberiya parêzgeha Hesekê, navenda çandê ya berê û avahiya Sendîkaya Endezyaran a li Qamişloyê weke navendên hilbijartinê hate diyarkirin. Li bajarê Kobanê jî ji bo dengdanê navendek hate avakirin.
Di çarçoveya hilbijartinê de li parêzgeha Hesekê wê ji Hesekê 3, ji Qamişloyê 4 û ji Dêrikê jî 2 bi giştî 9 nûner bi hilbijartinê bêne diyarkirin. Ji 15 endaman wê 5 endam jî ji aliyê serokê hikumeta demkî ve bêne tayînkirin. Nûnerê Serêkaniyê jî beriya niha hatibû diyarkirin. Li Kobanê jî wê du nûner bêne hilbijartin.
24 partiyên Kurdî nerazîbûn nîşanî mekanîzameya hilbijartinê da û weke dewama siyasetên paşguhkirina gelê Kurd bi nav kirin. Partiyan diyar kirin ku sînordarkirina nûnertiya Kurdan bi 4 kursiyên lawaz ji nav 210 kursiyan xapandineke eşkere ye li ser rastiyên demografî û siyasî yên li ser erdê.
Piştî ku rejîma Esed ket û Heyet Tehrîr El Şam bû desthilatdar, hilbijartin bi rêya tayînkirinan ji aliyê komîsyona hilbijartinan û serokê hikumeta demkî ve tên kirin.
Hejmara endamên Meclisa Gel 210 endam in, ji wan 70 ji aliyê serokê hikumeta demkî ve tên diyarkirin.
