Li Stenbolê jî serdegirtina polîsan a li ser Navenda Giştî ya CHP’ê li sê herêmên cuda hat protestokirin. Di çalakiya li Meydana Şîşhaneyê de midaxeleya polîsan û Kemal Kiliçdaroglu hatin protestokirin.
Li aliyê din, protestoyên xwendekarên Zanîngeha Bilgiyê ya Stenbolê ku li dijî girtina zanîngehê dabûn destpêkirin, di roja sêyem de berdewam kirin.
Li derdora Kampusa Santral Stenbolê tevdîrên tund yên polîsan hatin girtin û destûr nehat dayîn ku xwendekar bikevin kampusê. Hat diyarkirin ku di midaxeleya polîsan de gaza îsotê hat bikaranîn û Zehra Sude Karataş a ku ji bo piştevaniyê hatibû herêmê, hat destgîrkirin. Xwendekaran di daxuyaniya xwe de diyar kirin ku ew biryara girtinê nas nakin û dê têkoşîna xwe berdewam bikin.
Piştî geşedanên li ser Navenda Giştî ya Partiya Gel a Komarî (CHP), Platforma Ked û Demokrasiyê ya Edeneyê serdaneke piştgiriyê li Rêxistina CHP’ê ya Bajarê Edeneyê kir. Nûnerên partiyên siyasî, rêxistinên girseyî yên demokratîk û rêxistinên kedê yên ku li Parka Înonu hatin bal hev, bi meşê derbasî Serokatiya Bajar a CHP’ê ya Edeneyê bûn. Di daxuyaniyan de li dijî midaxeleyên li ser vîna gel, mafê hilbijartin û nûneratiyê û siyaseta demokratîk, banga têkoşîna hevpar hat kirin. Di dema serdanê de, daxwaza hinek endamên CHP’ê ya ji bo rakirina wêneya Kemal Kiliçdaroglu ya ku di avahiyê de daliqandî bû, bû sedema aloziyeke kurt. Di korîdoran de dirûşmeyên “Kemalê Xayîn” hatin berzkirin.
Di hola civînê ya Serokatiya Bajar a CHP’ê ya Edeneyê de Munir Korkmaz axivî û diyar kir ku tiştên diqewimin ne tenê CHP’ê, hemû siyaseta demokratîk dike armanc. Korkmaz anî ziman ku wan berê di midaxeleyên li ser DEM Partiyê de jî piştevanî nîşan dabû û îro jî bi heman helwestê li cem CHP’ê ne.
Suat Nacar jî midaxeleya polîsan a li ser Navenda Giştî ya CHP’ê wekî “rûpeleke nû ya ku ketiye dîroka derbeyan a Tirkiyeyê” nirxand. Li ser navê Sendîkaya Hemû Teqawîdan Îrfan Turan destnîşan kir ku ev pêvajo tê wateya midaxeleyeke li dijî demokrasiyê û diyar kir ku ew ê têkoşîna xwe bidomînin. Ugur Akpolat ê ku li ser navê Şaxa Akdenîzê ya Sendîkaya Teqawîdên Şoreşger axivî, diyar kir ku ew ê piştevaniyê mezin bikin. Sefa Sarica jî anî ziman ku Partiya Karkerên Tirkiyeyê (TÎP) di nav piştevaniyê de ye bi CHP’ê re.
Cîgirê Serokê Bajar ê CHP’ê yê Edeneyê yê Berpirsê Partiyên Siyasî û Mafên Mirovan Celal Yildirim jî diyar kir ku serdanên piştgiriyê hêzê dide wan û destnîşan kir ku ew ê li gora daxuyaniyên ku ji Navenda Giştî ya CHP’ê bên, xebatên xwe berdewam bikin. Li Îzmîrê jî welatiyên ku li ber Avahiya Bajar a CHP’ê civiyan, dirûşmeyên “Kemalê Xayîn” û “Rizgarî nîn e bi tenê serê xwe, yan her kes bi hev re yan jî tu kes ji me” berzkirin. Hat ragihandin ku bendewariya li ber avahiya partiyê berdewam dike.
