Konferans bi armanca xwe amadekirina ji bo pêvajoya aştî û civaka demokratîk hat lidarxistin.
Di bin dirûşmeya “jin di avakirinê de, jiyan di aştiyê de, azadî di kolektîfê de”, jinên ji seranserê Ewropayê tevlî konferansê bûn, xebatên xwe nirxandin û li ser jinûve avakirinê nîqaş kirin.
Di 6 komxebatên cuda de qadên girîng ên xebatên têkiliyên derve bi kûrahî hatin nîqaşkirin û ji bo berdewamkirina van xebatan biryar hatin dayîn.
Konferans di roja yekemîn de bi sînevîsyoneke ya ku dîplomasiya jinên Kurd a li Ewropayê nîşan da, destpê kir.
Di beşa yekemîn a konferansê de rewşa jinên cîhanê hat nirxandin. Bal hat kişandina ser şerê taybet ku hewl dide hêza rêxistina civakê bişkîne. Hat diyarkirin ku divê li hemberî vê têkoşîneke hevpar were meşandin. Girîngiya xebatên Jineolojî û konfederalîzma jinên cîhanê jî hat nîqaşkirin.
Di nirxandina kar û xebatên têkiliyên derve yên jin de bal hat kişandina ser pêwîstiya perspektîf û nêrînên ji bo pêvajoya aştî û civaka demokratîk.
Di komxebatan de bi taybetî li ser stratejî û avakirina peywendiyên karên derve û li ser xurtkirina torên heyî hat axaftin.
Beşeke din ê girîng karê enformasyonê bû ku di vê komxebatê de li ser amûr û rêbazên karê enformasyon hat nîqaşkirin.
Di komxebata li ser proje de hat destnîşankirin ku xebatên projeyan parçeyekî sereke yê xebatên civakî û xwerêveberinê ye û divê werin xurtkirin.
Ji bo nîqaşkirina girîngî û rêyên nû yên perwerdeyê, komxebatek hat lidarxistin.
Di roja duyemîn a konferansê de encamên komxebatan hatin pêşkêşkirin û nêrînên beşdarvanên din hatin girtin û di dawiya konferansê de biryar hatin girtin.
