Rêber Apo piştî “Banga Aştî û Civaka Demokratîk” diyar kiribû ku divê jin di pêvajoya nû de bi rola pêşengiyê rabin û bibin rêveberên pêvajoyê.
“Hewldana Jinê ya Pêwîstiya min bi Aştiyê heye” ku ji aliyê jinên Tirkiyeyî û Kurdistanî ve hate avakirin, di nava rojevên siyasî yên guherî de li hemberî paşguhkirina hewldanên aştiyê hefteya derbasbûyî bangeke nû kir.
Aktîvîsta hewldanê Dîlek Başalan wateya vê bangê û têkoşîna aştiyê ya jinan ji ajansa me re nirxand.
‘EM Ê DI 6-7’Ê HEZÎRANÊ DE BIÇIN DERSIMÊ’
Dîlek Başalan diyar kir ku divê ew giraniyê bidin ser rojeva aştiyê, divê jin aştiyê weke heqîqetê bibînin û got, “Li gel ku ewqas dem di ser Banga Aştî û Civaka Demokratîk re derbas bûye, ji aliyê Meclîsê ve gavên şênber nehatine avêtin. Ji bo bibîrxistina pêvajoya xitimî me xwest civîneke çapemeniyê lidar bixin. Bi vê civînê re banga me l jinan bû: Em bi hev re li ser aştiyê biaxivin, ragihînin bê aştî çima ji bo me heqîqeteke girîng e û nabe bê taloqkirin.
Me xwest nîşan bidin ku sernavên ku komîsyona li meclîsê pêşkêş kir dişopînin, ji bo bicihanîna van mijaran divê em bi hev re çi bikin û bendewariyan binirxînin. Li cografyayeke welê ku rojev bi lez diguhere, me xwest rojeva xwe ber bi aştiyê ve bikişînin.
Di encama civînên xwe yên dawî de bi taybetî li ser bûyera kuştina Gulistan Dokû komîsyonek hate avakirin. Me plansaziya komîsyonê jî di civîna xwe ya çapemeniyê de ragihand ku di 6-7’ê Hezîranê de em ê biçin Dersimê.”
‘JIN HEM BI RENGEKÎ DÎNAMÎK HEM JÎ BI BALDARÎ NÊZÎ PÊVAJOYÊ DIBIN’
Dîlek Başalan destnîşan kir ku jin hem bi rengekî dînamîk hem jî bi tedbîrî li pêvajoyê dinihêrin û got, “Beriya destpêkirina pêvajoya muzakereyê weke jin em li hev civiyabûn û me nîqaşek dabûn destpêkirin. Piştî ku pêvajoyeke bi vî rengî destpê kir, me kombûnên xwe zêde kir û hem bi civînan hem jî bi çalakiyên xwe me hewl dan hev bibihîzin û li dora ‘Pêwîstiya min bi aştiyê heye’ cihêrengiyên xwe bi wate bikin û civakî bikin.”
‘ME BI CIHÊRENGIYÊN XWE ETÊKOŞÎN HÎN BI WATE Û MAYINDE KIR’
Dîlek Başalan ragihand ku têkoşîna jinên Tirkiyeyî û Kurdistanî her tim bi hev re hate meşandin û destnîşan kir ku jinan cihêrengiyên xwe di nava têkoşîna bi hev re de bi wate kirin. Dîlek Başalan diyar kir ku ji aliyê têkoşînê ve hevgirtinek heye û got, “Yek ji mecbûriyetên vê têkoşînê ye ku em vê yekê li her qada civakê belav bikin. Weke jin me her tim têokşîna bi hev re ya bi cihêrengiyên xwe hîn bi wate û mayinde kir. Bêguman hin deman zor û zehmetî hatin kişandin, dikare bê kişandin; lê belê aliyê herî bedew ê têkoşîna jinan ew e ku bi piştevanî, mekanîzmaya rexnekirin-rexnedayinê zor û zehmetî û nakokî ji holê bêne rakirin.”
