Li gorî nûçeya Axiosê ku dispêre rayedarên Amerîkayî, rêveberiya Serokê DYA’yê Donald Trump ji bo pêvajoyeke dibetî a veguhastina siyasî amadekarî dike; di heman demê de, heke li welat kaos derkeve, vebijêrka destwerdana leşkerî jî di rojevê de digire.
Di nûçeyê de hate diyarkirin ku cezayên DYA’yê yên li ser Kûbayê zextekî giran li ser rejîmê çêdike û li Washîngtonê senaryoyên curbecur derbarê geşedanên dibeyî de tên nirxandin.
AMADEKARİYÊN SOUTHCOMÊ
Di vê çarçoveyê de hate ragihandin ku Fermandariya Başûr a DYA’yê (SOUTHCOM), meha borî bi armanca amadekarî ji bo destwerdana leşkerî ya dibeyî a li ser Kûbayê, tetbîqatek li dar xistiye.
Rayedarên Amerîkayî angaşt kirin ku di vê qonaxê de tu planeke dagirkirinê tune ye, lê destnîşan kirin ku heke Trump fermanê bide, artêş amade ye. Rayedaran bi taybetî nirxandin ku di mehên havînê de dibe ku qutbûna elektrîkê û kêmasiya xwarinê bibe sedema nerazîbûnên civakî.
KÛBA NE MÎNA WENEZÛELAYÊ YE
Ji aliyê din ve hate destnîşankirin ku rêveberiya Trump di wê baweriyê de ye ku modeleke guhertina desthilatdariyê ya mîna mînaka Wenezûelayê, li Kûbayê pêkan nîn e. Di nûçeyê de hate gotin ku avahiya rêveberiya Kûbayê bêtir “kolektîf” e û Washîngtonê nekaribûye lîderekî alternatîf û bihêz ê ku bikaribe rêveberiya welat dewr bigire, diyar bike.
Hate diyarkirin ku ji ber ku beşeke girîng a cezayên DYA’yê yên li ser Kûbayê bi rêziknameyên zagonî hatine mîsogerkirin, heke guhertineke siyasî ya dibeyî pêk bê jî, rakirina van cezayan dê ne hêsan be.
