Ji bo azadiya Rêber Apo kampanya û xebatên li qada navneteweyî, dewam dikin. Ev xebatên ku demek dirêje didomin, li ser esasê banga ji bo “mafê hêviyê” zêde bûne.
Tê payîn ku meha Hezîranê Komîteya Wezîran a Konseya Ewropayê têkildarî “mafê hêviyê” yê ji bo Rêber Apo, hevdîtinê bike. Biryara ku di vê çarçoveyê de were girtin, ji bo siberoja çareseriya pirsgirêka Kurd pir girîng e.
Yek ji saziyên ku di vê qadê de xebat dimeşîne, Kongreya Civaka Kurdistaniyên Demokratîk a Ewropayê (KCDK-E) e ku xwedî bi sed hezaran endaman e. Hevserokê KCDK-E’yê Engîn Sever ku ji bo “mafê hêviyê” li gelek bajarên Ewropayê çalakiyan lidar dixe, têkildarî mijarê ji ANF’ê re nirxandin kir.
Sever bi bîr xist ku Rêber Apo ji sala 1999’an ve li Girtîgeha Îmraliyê di bin şert û mercên tecrîdê de tê ragirtin û got, “Dadgeha Mafên Mirovan a Ewropayê (DMME) sala 2014’an biryara mafê hêviyê da. Tevî wextê derbas bûyî jî, mixabin ev biryar hîn jî nayê bicihanîn. Li hemberî vê yekê têkoşîna gelê Kurd û dostên wê ya ji bo azadiya Rêber Ocalan, ti carî nerawestiya.”
Sever destnîşan kir ku bi banga Rêber Apo ya 27’ê Sibata 2025’an têkoşîn êdî gihişte qonaxeke cuda û ragihand ku Kurdên li dîasporayê li ser esasê vê bangê derbasî qonaxeke nû ya rêxistinbûnê bûn. Sever got, “Piştî bangê weke KCDK-E em bi saziyên xwe yên civakî û pêkhateyên xwe re li ser esasê vê bangê ketin nava xebatekî. Li ser vê bingehê nêzî salek û nîv e bênavber em têkoşîna xwe dewam dikin.”
Hevserokê KCDK-E’yê Sever daxuyaniyên erênî yên dewletan a piştî banga Rêber Apo ya “Aştî û Civaka Demokratîk” bi bîr xist û diyar kir ku ev daxuyaniyane bi demê re tenê bûn gotin. Sever got, eger ev dewlet samîmî bûna, wê ji bo tevkariya li pêvajoyê gavên şênber avêtiban û destnîşan kir ku bicihanîna “mafê hêviyê” jî yek ji van gavên şênber e.
Engîn Sever bal kişand ser wextê ku Komîteya Wezîran a Konseya Ewropayê ji bo bicihanîna mafê hêviyê, daye Tirkiyeyê û ev tişt bilêv kir, “Ev wext di meha Hezîranê de car din tejî dibe û dewleta Tirk têkildarî vê yekê hîna ti gav neavêtiye. Dihat hêvîkirin ku Komîte di meha Hezîranê de vê mijarê car din binirxîne. Lê li gorî gotinên me bihîstine, komîte ji ber têkiliyên siyasî û aborî yên bi dewleta Tirk re wê vê mijarê negire rojeva xwe û di vê nuqteyê de israrek heye. Tam di vê demê de divê em zexta civakî pêş bixin û vê mijarê bi israr di rojevê de bigirin. Weke Kurdistaniyên li dîasporayê û dostên wan, em ê bi çalakî û merasîmên ku lidar bixin, daxwaz bikin ku mafê hêviyê rast were nirxandin û nîqaşkirin. Bi rojane ji Cenevreyê heya Parîsê, ji wir heya Berlînê gelê me li qadan e û daxwazên xwe radigihîne saziyên rayedar. Di vê çarçoveyê de li her qada ku em lê rêxistinkirî ne, wê çalakiyên me çêbibin.”
Sever anî ziman ku bicihanîna ‘mafê hêviyê’ di heman demê de ji bo çareseriya demokratîk a pirsgêka Kurd wê tevkariyeke mezin bike û diyar kir ku saziyên rayedar divê li gorî vê pêvajoyê gav bavêjin.
Hevserokê KCDK-E’yê Engîn Sever ji bo çalakiyên ku wê bi daxwaza bicihanîna ‘mafê hêviyê’ bên lidarxistin, banga tevlîbûnê kir û ev tişt got, “Her çendî ku pêvajoyek hebe jî, sîstema tecrîdê ya Îmraliyê dewam dike. Yê ku li Îmraliyê di bin tecrîdê de tê ragirtin rastiya gelê Kurd, têkoşîna azadiyê û jiyana azad e. Ev tecrîda ku li me tê ferzkirin mîna heta roja îro, ji vir û şûnde jî em ê qebûl nekin. Di navenda têkoşîna me de, demildest bicihanîna azadiya fîzîkî ya Rêber Apo heye. 9-10-11’ê Hezîranê wê civînên Komîteya Wezîran a Konseya Ewropayê bên lidarxistin. Ji bo ku têkildarî mafê hêviyê li vir biryar were dayîn, divê em têkoşîna xwe geş bikin. Li ser vî bingehî bi rojane li bajarên cuda yên Ewropayê em di nava çalakiyan de ne û em ê di nava çalakiyan de bin. 9 û 10’ê Hezîranê jî em ê çalakiyên mezin lidar bixin. Em bang li dostên xwe û gelê xwe; ji 7 heya 70 salî li her kesî dikin ku tevlî van çalakiyan bibin û heya azadiya fîzîkî ya Rêber Apo pêk tê, bê navber di nava çalakiyan de bin. Em ê azadiya fîzîkî ya Rêber Ocalan pêk bînin. Azadiya wî, azadiya me ye. Em xwedî li azadiya xwe derbikevin.”
