Tora Mafên Mirovan a Kurdistanê der barê metirsiya darvekirina du xwepêşanderan ji aliyê desthilatdariya Îranê ve bi raporekê hişyarî da.
Di raporê de hate diyarkirin ku xwepêşander Elî Fetah Kemalî û Mihemed Neqîzade yên ku ji aliyê Dadgeha Bilind a Îranê ve cezayê darvekirinê li wan hatibû birîn, piştî erêkirina cezayên wan, ji girtîgeha Tehrana Mezin (Feşafûye) ji bo girtîgeha Qizilhesar a Keracê hatine veguhestin.
Hate destnîşankirin ku erêkirina cezayê darvekirinê yê her du xwepêşanderan di Dîwana Bilind a Îranê de, metirsiya bi cihanîna darvekirinê zêdetirkiriye.
Elî Fetah Kemalî yê 33 salî û niştecihê Malezyayê, di xwepêşandanên dawî yên gelên Îranê de hatibû binçavkirin û piştî demekê ji aliyê lîqa 26 a Dadgeha Şoreşa Îslamî ya Tehranê ve bi serokatiya dadwer Îman Efşarî, bi tohmeta ‘serhildanê’ cezayê darvekirinê lê hatibû birîn.
Mihemed Neqîzade yê 25 salî û xelkê Tehranê jî, ji ber xwepêşandanên dawî yên gelên Îranê hatibû binçavkirin û ji aliyê lîqa 15 a Dadgeha Şoreşa Îslamî ya Tehranê ve bi serokatiya dadwer Qasim Selawatî cezayê darvekirinê li ser hatibû pejirandin.
Heta niha tu agahiyên zêdetir derbarê pêvajoya dadwerî, çûyîn û wergirtina parêzer û hûrguliyên dosyayên wan nehatine weşandin.
