Merasîma bîranînê li Şaxê Enqereyê yê Odeya Endezyaran a Înşaetê hate lidarxistin û nûnerên rêxistinên girseyî yên demokratîk, partiyên siyasî, hunermend, nivîskar û gelek welatî tevlî bûn.
Darbesta Tellî li ser milê beşdaran li ber çepikan li salona bîranînê hate danîn. Piştre deqeyek rêz hate girtin û helbestên wî hate xwendin. Grûmp Gorûm jî berhema “Siyrilip Gelen” a ji helbesta Tellî got.
Nivîskar Mahmût Temîzyurek li bîranînê axivî, ji bo Ahmet Tellî got, “Helbestvanekî mezin bû” û destnîşan kir ku wî helbesta xwe bi têkoşîna civakî re kir yek.
Keça Tellî Eylul Telî jî diyar kir ku bavê wê ne tenê pirtûkên xwe, her wiha rûmet, wijdan û mîrateya hêviyê li pey xwe hişt.
Eylul Tellî got, “Bû helbestvanek ku bi pênûsa xwe ya li dijî zilmê tarî ronî kir. Em îro ji bo silavkirina mîrateya wî li hev civiyan e.”
Bi navê Federasyona 78’an a Şoreşger, Komeleya Zanistî, Huner û Wêjeyê, her wiha gelek hunermend û siyasetmedar li bîranînê axivîn û bal kişandin ser sekna civakî û wêjeyî ya Tellî.
Di bernameyê de sînevîzyonek li ser jiyana Ahmet Tellî hate nîşandan.
Girseya gel piştî bîranînê cenazeyê Tellî ji bo veşartinê bir Goristana Karşiyaka ya Enqereyê.
