Partiya Jiyana Azad a Kurdistanê (PJAK) bi boneya 19’emîn salvegera şehadetê endamê Meclîsa PJAK’ê şehîd Dilxwaz Bîngol (Mihemed Elî Algunerhan) bi bîr anî ku di 13’ê Tîrmeha 2006’an de ji ber êrişa hêzên Îranê li devera Kosalan a ser bi bajarê Merîwanê ve şehîd bibû.
Daxuyaniya PJAK’ê wiha ye:
“Di 19’emîn salvegera şehadeta endamê meclîsa partiya me PJAK’ê Dilxwaz Bîngol de weke partî wefadariya xwe nîşan didin ku ew ji baştirîn zarokên gelê xwe bû û ji bo herdemê bû beşek ji dîroka serbilind a welatê xwe. Em bi vê boneya bîranîna şehîd Dilxwaz û tevahiya şehîdên rêya azadiya gelê Kurd û gelên bindest bi bîr tînin.
Şehîd Dilxwaz Bîngol (Mihemed Elî Algunerhan) di sala 1966’an de li gundê Vînsûrê yê ser bi bajarê Çewligê (Bîngol) li Bakurê Kurdistanê ji dayik bûye. Di sala 1980’yî de dema ciwan bûye koçî Ewropayê kir û li welatê Fransayê bi cih bû. Piştî naskirina Tevgera Azadiya Kurdistanê, di sala 1991’ê de beşdarî Tevgerê bû û di nava refên gerîla de dest bi têkoşînê kir.
Şehîd Dilxwaz yek ji damezrînerên partiya me PJAK’ê bû. Di qonaxên dûr û dirêj de jî di rêveberiya partiyê de cih girt û heta dema şehadeta xwe endamê meclîsa partiya me bû. Ew sembola têkoşîn, fedakarî, exlaq û netewebûnê bû.
Ew ‘Kurdekî azad’ bû ku sînorên Kurdistanê bi fermî nedinasî û li her devera welat ku pêwîstî pê hebûya têdikoşiya. Di wê serdemê de dema biryar da ku êdî li Rojhilatê Kurdistanê têbikoşe, bi daxwaz û hêzeke bêhempa di her qonaxekê de li deverekê fermandarî û pêşengtiya têkoşînê dikir. Li herêm û bajarên weke Urmiye, tevahiya Mukiriyan û Sineyê, yek ji pêşengên jêhatî yên birêxistinkirina gel bû. Beşek ji têkoşîna wî li Tehranê û demekê jî li Xorasanê bû. Heza wî ya ji bo naskirina herêmê û pêdaçûna wî ya ji bo têkoşînê, teşwîqdarê kar û çalakiyên wî yên li herêmên cuda bû.
Di nava hevalên xwe de jî yek ji hîmên herî bihêz ên hevaltiyê û dilsoziyê bû. Di qonaxên herî dijwar ên têkoşînê de, her dem ji bo heval û rêxistina xwe bû stargeh. Berê jî li Başûr û Bakurê Kurdistanê erkên xwe yên şoreşgerî bi cih anîbûn û demekê jî ji bo kar û dermankirina bijîşkî li Rojavayê Kurdistanê mabû. Ew mînaka herî rast a kesayetiyekî şoreşger bû ku her çar parçeyên welat wek qada têkoşînê didît. Rawestgeha dawî ya têkoşîn û jiyana wî jî devera Kosalan a li nêzî bajarê Merîwanê bû ku li wir di 13’yê Tîrmeha 2006’an de ji ber êrişa hêzên rejîma Îranê şehîd bû.
Em tevgereke şoreşger in ku baweriya me bi yekitiya ruhanî û fikrî ya gelê me heye. Me di vê rêyê de têkoşîn kiriye û heta niha bi dehan endamên meclîs û fermandarên me di vê rêyê de bûne pêşengên têkoşîna me. Şehîd Dilxwaz Bîngol yek ji wan şehîdane ku bi hişmendiyeke kûr û pêdaçûneke mezin a têkoşînê, bi wêrekiyeke mezin gav avêt qada têkoşînê û bi tûrikekî tije ezmûn û evîna welat, bû kurê tevahiya welatê xwe.
Di malbata wî de şehîdên din jî hene ku ev yek asta welatparêziya wan nîşan dide û îsbat dike ku malbateke wiha dikare zarokekî wiha perwerde bike. Wî her çar parçeyên Kurdistanê wek qada têkoşîna li ser bingeha baweriyên xwe didît û yek ji heval û şopînerên rastîn ên Rêber Apo bû, ku dersa têkoşînê ji wî fêr bibû û her dem hewl dida li hember van dersan dilsoz bimîne. Dilsoziya wî nîşan da ku ew ji baştirîn zarokên gelê xwe ye û ji bo herdemê bû beşek ji dîroka serbilind a welatê xwe.
Dîroka şehadetê ya şehîd Dilxwaz nêzîkî 14’yê Tîrmehê bû, ew bû heval û şopînerê şehîdên 14’yê Tîrmehê. Ew rê bi zehmetiyên mezin û bi xeta can hat nexşandin da ku heqîqetperestî û heqîqetxwazî zindî bimîne. Wî meşaleya vê heqîqetxwaziyê girt destê xwe û li ser lûtkeya gelek çiyayên Rojhilatê Kurdistanê zindî hişt.
Ew hevalê Akîf Mamo û Zîlan Urmiyeyê bû, hevalê wan hevalan bû ku bi saya wan niha têkoşîn li welatê me gihîştiye asteke giring û bûye bingehek ji bo azadîxwaziya gelên din jî. Têkoşînek ku bû amûreke fikrî ji bo jiyana hevpar û aştiyane li ser wê xaka ku mirovahiyê lê serî hildaye. Dilxwaz Bîngol kur û berhemê wê mirovahiyê bû.
Meclîsa Partiya Jiyana Azad a Kurdistanê (PJAK), di salvegera şehadeta şehîd Dilxwaz Bîngol de, bîranîna wî bi rûmet bilind dinirxîne û di vê qonaxa dijwar a têkoşînê de soza dilsoziya bi xewn û armancên wî re nû dike. Bîranîna wî bilind û rêya wî ya tije şopîner be.”
