Sosreta anîna bi sedan kes bi pere ji bo çalakiya Kemal Kiliçdaroglu a li Sariyera Stenbolê, mezin dibe. Gursel Tekîn, ku wekî qeyûm ji bo Serokatiya CHP’ê ya Stenbolê hate tayînkirin, li dijî nûçeya rojnamevana BîrGunê Ebru Çelîk, ya ku xwe wekî fîgûr tomar kiribû û bûyer di cih de belge kiribû, pêvajoya dozê dide destpêkirin û hedef digire. Gursel Tekîn û ajansê ev îdîa red kirin. Lê belê serokê tîma fîgûran Sezer Çakmak ev axaftin derevandin. Çakmak ê ku ji ANF’ê re axivî, diyar kir ku ew bi soza kişandina rêzefîlmê birine çalakiyê û got: “Di çalakiya Kiliçdaroglu de em wekî amûrê siyasetê hatin bikaranîn.”
‘BI HINCETA KIŞANDINA RÊZEFÎLMÊ EM BIRIN ÇALAKIYA KILIÇDAROGLU!’
Sezer Çakmak, diyar kir ku Ajansa Elyo Castê bi hinceta kişandina rêzefîlmê ew birine merasîma rozetkirinê ya Kemal Kiliçdaroglu. Çakmak, da zanîn ku nêzî 300 kes bi heman derewê anîne vê çalakiyê û got ku piştî li ber Trump AVM’yê siwarî otobusan bûne, dîtin ku hatine çalakiya CHP’ê ya li Sariyerê. Çakmak, destnîşan kir ku tu têkiliya wî bi tu partiyê re tune ye û ew tenê ji bo nanê zikê xwe dixebite.
‘EM BI EŞKEREYÎ WEKÎ AMÛRÊ SIYASETÊ HATIN BIKARANÎN!’
Çakmak, anî ziman ku piştî rastiyê fêm kiriye wî li wê derê vîdeo kişandine, hevpeyvîn bi fîguran re kirine. Çakmak, got ku li ber derê salonê provaya sloganên piştgiriyê ji wan re hatiye kirin. Çakmak, got ku ew ne alîgirê tu aliyekî siyasi ye û bertek nîşan da ku bêyî agahdariya wan ew kirine amûra siyasetê. Çakmak, diyar kir ku di çalakiyê de ji xeynî qedehek çay û avê tiştek nedane wan, hin kes ji birçîna û westanê ketine û got ku bi vî awayî bi hestên mirovan lîstine.
‘950 TL BI DESTAN DAN Û AGAHIYÊN ME YÊN TAKEKESÎ GIRTIN’
Çakmak, ragihand ku piştî çalakiyê ajansê 950 TL bi destan daye her fîgûranekî û hejmara nasnameyê, nav û paşnavên wan wergirtine. Çakmak got ku derbarê wergirtina agahiyan tu daxuyanî nedane wan. Çakmak, got ku ger bêyî agahdariya wî tiştekî wiha çêbibe û ew bibe endamê CHP’ê, ew ê gilî bike.
‘AJANSA CASTÊ JI ME XWEST KU EM VÎDEOYEKÊ DEREWANDINÊ BIKŞÎNIN’
Çakmak, da zanîn ku piştî di Rojnameya BîrGunê de nûçeya “ji bo çalakiya Kiliçdaroglu fîgûrên bi pere hatine birin” derket, berpirsê ajansê li wî geriya ye û ji wî xwestiye vîdeoyeke derewandinê bikşîne ku tê de bibêje ew bi daxwaza xwe û bêyî stendina pereyan çûye wê derê. Çakmak, got ku wî ev daxwaz red kiriye û got ku divê ajans ciwanan nekin amûrê siyasetê. Her wiha diyar kir ku ji ber wêneyên wî bêyî destûr hatine belavkirin, ew ê êdî bi vê ajansê re nexebite.
‘EM Ê HER DEM RESTIYÊ BIPARÊZIN!’
Çakmak, diyar kir ku Gursel Tekîn ev îdîa red kiribin jî ew ê her dem rastiyê bibêje û got ku ew ê piştgiriya kesên ku mafê kedkaran diparêzin bike. Çakmak, got ku tiştên qewimîn bi temamî ev in û ger dixwazin dikarin li dijî wî gilî jî bikin.
