Kurdên Moskowê bi civîneke taybet cangoriyên Fermana Şengalê bi bîr anîn. Ev civîn li Mala Kurdan pêk hat.
Beşdaran belgefîlmekî ku bi berfirehî li ser dîroka Şengalê hatibû amadekirin temaşe kir.
Arif Ezmanî, bi navê Yekîtiya “Êzidxan” axivî û Şengalê ne tenê weke herêmek, di heman demê de weke neynika nasname û bîreweriya neteweya Kurd şîrove kir. Wî bal kişand ser wê rastiyê ku Şengal di pêvajoya dîrokê de bûye sembola berxwedan û bîranîna hevpar a hemû Kurdan.
Ezmanî destnîşan kir ku Şengal weke kevirekî bingehîn ê dîroka Kurdan e û bilêv kir ku ev herêm tenê cihekî erdnîgarî nîne, bîranîna hevpar a hemû gelê Kurd e.
Ezmanî her wiha tekez kir ku tenê bi yekîtiya netewî wê pêşî li komkujiyên nû bê girtin û got: “Divê em ji kokên xwe venegerin; divê tu carî ji rastiya xwe ya dîrokî dûr nekevin. Yekitiya netewî tenê riya rizgariyê ye, tenê ev yekîtî dikare deriyên pêşerojeke ronî veke û nehêle ku careke din çek li ser bêgunehan bê avêtin. Em di serdemeke pir hesas de dijîn. Rewşa îro ne diyar e, lê divê em ji vê nediyariyê netirsin; divê amade bin û parastina xwe û ya nifşên xwe bikin.”
Ezmanî ji bo hişyarî û yekîtiyê bang kir: “Divê em her kêlî amade bin, ji bo parastina xwe, ji bo parastina zarokên xwe û ji bo ku dîroka me careke din bi xwîna bêgunehan neyê nivîsandin.”
