Êrişa li dijî şêniyên resen ên Serêkaniyê ku piştî 7 salan ji koçberiya ji neçarî di çarçoveya peymana 29’ê Çileyê de li warê xwe vegeriyan û di encamê de gelek kes birîndar bûn, weke hewldaneke metirsîdar a li ser paşeroj û ewlehiya Sûriyeyê tê dîtin.
Hevserokê TEV-DEM’ê yê bajarê Kobanê Bekir Hec Îs li ser mijarê ji ANF’ê re axivî, destpêkê êriş şermezar kir û destnîşan kir ku divê komên çete yên êrişkar bêne darizandin.
‘ARMANCA WAN TINEKIRINA GELÊ KURD E’
Hec Îs got: “Koçberên Serêkaniyê ku di nava mercên herî zehmet de derbasî bajarê xwe bûn, bûn hedefa êrişê. Ew êrîş dikeve çarçoveya armanca tunekirina çandekê. Em jî hikumeta demkî ya Sûriyeyê berpirsyarê wê yekê dibînin. Divê ewlehî ji wan re bibûya. Ew komên çete ji bajarên Sûriyeyê yên cuda heta ji Iraqê jî di nava Serêkaniyê de heye. Êriş û dirûşmên di dema êrişê de dihatin qîrîn xeteriyeke cidî ye. Xelkê Serêkaniyê yê resen Ereb û Kurd in û hevdu qebûl dikin. Lê belê ev kes jî heta di nava xwe de şaneyên DAÎŞ jî hene. Ew jî xeteriyeke li ser tevahî Sûriyeyê ye.”
‘JIYANA KOÇBERAN DI XETERIYÊ DE YE’
Bekir Hec Îs bal kişand ser rewşa koçberên Girê Spî jî kir û got, “Metirsî li ser jiyana koçberan heye. Mînaka wê jî êrîşa li ser karwana ewil yê Serêkaniyê. Divê ew kesên ku êrîş kirin bên darizandin û kesên ne ji Serêkaniyê jî ji wî bajarî derbikevin. Wê demê xelk wê bi ewlehî derbasî bajarê xwe bibe. Mayîna wan kesan di nava Serêkaniyê ewlehiya tevahî Sûriyeyê jî dixe metirsiyê. Niha ew êrîşa ku pêk hat Rojava bi giştî bi xwe re rakir, ji ber ku hemû ew mirovên hev in. Ji ber mirovên xwe ve aciz bûn.”
