Li Şengalê Rizgarbûyên Êzidî yên ji sûcên DAIŞ’ê ji ber hewldanên ji bo sererastkirina yasaya rizgarbûyên ji destê sûcdarên DAIŞ’ê daxuyaniyek da.
Di daxuyaniyê de hate destnîşankirin ku ew her sererastkirina yasayî ya ku bandorê li ser naveroka yasaya rizgarbûyên Êzidî bike red dikin ku bi hejmara 7 a sala 2021’ê hatibe dayîn. Ev yasa piştî bi salên nexweş û binpêkirinên li ser Êzidiyan ya sala 2014’an bi destê DAIŞ’ê hate kirin, derket.
Di dewama daxuyaniyê de bal kişand ser xeteriyên DAIŞ’ê yên li ser herêmê û hate gotin ku Êzidî hê jî di bin bandora sûcên DAIŞ’ê de dijîn û ev hate gotin: “Hê jî bi hezaran kes winda ne û çarenûsa gelek kesî nediyare. Gelek gorên komî nehatine vekirin. Yasaya Rirzgarbûyên Êzidî ji bo girêdanbûna bi êş û qurbaniyên Êzidî re dewleta Iraqê derxistiye. Her guherîn û sererastkirineke di vê qanûnê de yan jî lewazkirina wê bi çi hincetê dibe bila bibe, tê wateya ji revîna ji erk û berpirsyariyan.”
Hate diyarkirin ku ya ku bi serê Êzidiyan hat ji ber nasname û baweriya wan bû û ev hate gotin: “Em ne li dijî mafê ti pêkhateyeke ya Iraqê ne rû bi rûyê hovîtiya DAIŞ’ê hatibin. Rêz ji mafê hemû qurbaniyan re digirîn. Çareserkirina mafê qurbaniyan bi rêya sererastkirina yasaya taybet ku di destpêk de ji bo naskirina sûcê komkujiya Êzidiyan biryar hatiye dayîn red dikîn. Em her cûre yasayekê red dikin ku bibe sedemê sûdwergirtina hinek kom yan jî malbatên têkiliya wan bi DAIŞ’ê re hene. Em piştrast dkin ku pêwîste yasa parastîbe ji bo her kes û aliyên ku destê wan di sûc de hebe yan jî dixwazin sûcan veşêrin. Yasaya Rizgarbûyên Êzidî ne îmtiyazeke, belkû beşeke ji berpirsyariya dewletê ya li hemberî qurbaniyên sûcên komkujiyê û helwesteke fermî ye li hember ewa ku bi serê civaka Êzidî hatiye.”
Herî dawî hate gotin ku Rizgarbûyên Êzidî yên ji Sûcên DAIŞ’ê tenê daxwaza mafê xwe dikin, diyar kirin ku ew naxwazin êş û qurbaniyên wan bibin mijarên siyasî û ev hate gotin: “Parastina mafê rizgarbûyên Êzidî ne tenê berpirsyariya civaka Êzidiye, belkû erk û berpirsyarî dikeve stûyê dewleta Iraqê jî.”
