Taziye û bîranîna ku ji bo gerîllayên HPG û YJA-STAR’ê li Amedê ji bo sê rojan hate lidarxistin, bi dawî bû. Wêneyên gerîllayan bi gul û rengên kesk, sor û zer hatin xemilandin û di qada taziyeyê de pankartên “Şehîd namirin” û “Şehîd rûmeta me ne” hatin daleqandin.
Ji xeynî malbatan bi hezaran kes tevlî taziyeya ku li Parka Koşuyoluyê hate lidarxistin bûn. Beşdaran sersaxî ji bo malbatan xwestin û timî dirûşmeya “Şehîd namirin” hatin berzkirin.
Di tevahiya sê rojan de, hestên xemgînî, piştevanî û têkoşînê di nava hev de hate jiyîn û malbatan hem ji hevdu hem jî ji gel piştgiriyê girtin. Ji xeynî Amedê bi hezaran kes tevlî taziyeyê bûn.
Dîmenê dayikekî 70 salî ku tevî di rêveçûnê de zehmetî dikişand û yek bi yek hemû wêneyên gerîlayan maç kir û malbatan silav kir, yek ji kêliyên taziyeyê yên herî balkêş bû. Jin û ciwan di tevahiya bernameyê de bi awayekî çalak tevlî bûn û îşaret bi piştevanî û têkoşînê hat kirin.
Daxwaza hevpar a gelê ku hem ji bo şînê hem jî ji bo têkoşînê hatin bav hev, ew bû ku berdêlên ku hatine dayîn bigihijin armancên xwe û azadiya gelê Kurd pêk were.
Di roja sêyemîn de li Parka Koşuyoluyê bîranîn hate lidarxistin. Wêneyên gerîllayên şehîd bi mûman li qadê hate bicihkirin û wêneyên Rêber Apo jî cih girtin. Di bîranînê de timî dirûşmeyên, “Şehîd namirin” hatin berzkirin û tevî xemgîniyê hestên hêvî û serbilindiyê jî hatin jiyîn.
Bernameya ku bi sirûda “Çerxa Şoreşê” destpê kir, bi pêşandana dîmenên ku jiyana gerîllayên şehîd vedigot, bi dawî bû.
Parka Koşuyoluyê ku berê şahidî ji gelek hevdîtinên dîrokî û kêliyên girîng re kiriye, bi taziye û bernameyên bîranînê ku sê roj dewam kir re, careke din cihê xwe yê di bîra civakî ya gel de ku nêzî nîv sedsale dewam dike, nîşan da.
