Konseya Rêveber a Kongreya Neteweyî ya Kurdistanê (KNK) li ser qetilkirina şervanê Tûgaya Hesekê Sîpan Hiznî û bûyerên piştre li Kobanê rû dan, ku di encamê de 8 kesan jiyana xwe ji dest dan, 18 kes jî birîndar bûn daxuyaniyek da.
Daxuyaniya KNK’ê bi vî rengî ye:
“Bi sedema kuştina leşkerê Lîwaya Hesekê Rojavayê Kurdistanê Sîpan Heso û belavkirina dîmenên kuştina bi sêwazekî hovane ji aliyê kujeran ve li ser torên mediya civakî hatibûn belavkirin, bû sedema şok û hêrsên fireh di nav gelê me de. Li çend bajar û navçeyên rojavaya Kurdistanê xwepêşandanên gelêrî hatin lidarxistin. Beşdarên van xwepêşandanan bûyera hovane şermezar kirin û daxwaza dadmendiyê û hesabpirsîna ji kesên berpirsiyar hate kirin.
Ya ku li bajarê Kobanê di çarçoveya vê bûyerê de qewimî û di encamê de hêzên ser bi Şamê û komên bi ser Tirkî ve hejmarek ji xwepêşanderan şopandin û girtin û hewldan ku wan bibin Girtîgeha Helebê. Paşê jî bûyerên li Girtîgeha Kobanê û derdora wê ku di encamê de 8 kesan jiyana xwe ji dest dan û 18 kesên din birîndar bûn, di nav wan de hin kesên rewşa wan giran hene û pêşketineke pir metirsîdare.
Ev rewş pêdivî bi rawestaneke lezgîn û berpirsiyariyeke cidî û her wiha daxwaza lêkolînek zelal, serbixwe û bêalî heye, da ku rastiya bûyeran bête eşkerekirin, berpirsiyariyên bûyerê bên diyarkirin û her kesê ku tê piştrastkirin ku beşdarî vê bûyerê bûne, ji wan kesan hesab bê pirsîn.
Em ji hemû ji birîndaran re saxlemî û başbûna bilez dixwazin; ji bo şehîdan rehmetê, ji malbatan û gelê xwe re sersaxîyê dixwazin.
Di heman demê de, em bang li gelê xwe dikin ku xwe kontrol bikin û di asta herî bilind de hişyarî û bi berpirsiyari tevbigerin, mal û milkên giştî û taybet biparêzin û rê nedin ku hêrs bibe sedema kaos û wêrankirinê an jî pevçûnên navxweyî. Xwepêşandan û derbirîna nerazîbûnê mafekî rewa ye, lê kaos çareserî nîne. Parastina mirovan û mal û milkên wan berpirsiyariyeke hevpar e.
Her wiha, em bang li hemû aliyên hikûmetî û ewlehiyê yên têkildar dikin ku berpirsiyariyên xwe bi tevahî hilgirin, ji provokasyonê û bikaranîna hêzê dûr bisekinin, bi gelê herêmê re bi ruhê berpirsiyariyê û rêzgirtinê re mijûl bibin û kanalên cidî yên diyalogê vekin, da ku sedemên tengezariyê bên çareserkirin û ji bilindkirina tengezariyê û ferzkirina rewşa heyî dûr bê.
Em bang li rûspî, kesayetiyên civakî, partiyên Kurdî û berpirsiyarên herêmê dikin ku rola xwe ya rastîn bilîzin, ji bo aramkirin, rêberîkirin û kontrolkirina tengezariyê û ji bo parastina aştiya civakî beşdar bibin.
Em niha di qonaxeke hestiyar de ne ku ji hemûyan dixwaze zimanê aqil û têgiştinê li pêş bixin. Ji provokasyonê, reaksiyonên bilez û ketina nav kaos û tundiyê dûr bisekinin û rê li ber her kesê ku dixwaze rewşa hêrsê ji bo xerakirina ewlekarî û aramiya civakê bikar bîne, bigirin.
Ji ber vê yekê, em dîsa daxwaza xwe ya eşkerekirina hemû rastiyê û hesabpirsîna ji her kesê ku berpirsiyariya wî ya sûc û binpêkirinan tê piştrastkirin, dubare dikin.
Em bang li hemû aliyan dikin ku aram bin, xwe kontrol bikin, aştiya civakî biparêzin, mal û milkên giştî û taybet biparêzin û berjewendiya giştî li ser hemû hesabên din pêş bixin.”
