Endamên Heyeta Îmraliyê Îmraliyê ya Partiya Demokrasî û Wekheviyê ya Gelan (DEM Partî) Pervîn Buldan, Mithat Sancar û Ozgur Faîk Erol di 13’yê Îlonê de li gel Rêber Apo civiyan. Piştî hevdîtinê, Heyeta Îmraliyê daxuyaniyek belav kir û nirxandinên Rêber Apo yên derbarê pêvajoyê de bi raya giştî re parve kir. Ev hevdîtin di serdemekê de ku îdiayên derbarê notên hevdîtina Rêber Apo de, provokasyon û spekulasyon zêde bibûn û van nîqaşan di rojeva Tirkiyeyê de cîhekî berfireh girtibû, pêk hat.
Rayedarên DEM Partiyê li ser van nîqaşan û naveroka civîna Heyet aÎmraliyê ya bi Rêber Apo re agahî dan rojnamevanan. Rayedaran diyar kir ku Rêber Apo careke din destnîşan kiriye ku hin zabitnameyên hevdîtinê yên hatine belavkirin û bûne sedema nîqaşan, tu eleqeya wan bi rastiyê re tune ye. Hate ragihandin ku Rêber Apo bal kişandiye ser nîqaşên ku ji ber kêmxuyakirina nirxandinên wî yên berê yên di ‘Manîfestoya Civaka Demokratîk’ de yên li ser Îdrîsê Bîdlîsî derketine holê.
Rêber Apo ji bo zelalkirina mijarê ev peyam da: “Bîranîna hevpeymaniya di navbera mîrektiyên Sunî û Osmaniyan de ya Îdrîsê Bîdlîsî, ne ji bo vejandina wê ya bi kêmasiyên wê re ye. Berevajî vê, armanc ew e ku himendiya hevpeymaniyê ya ku di raboriyê de li ser bingeha berjewendiyên mîr û desthilatdaran dihat çêkirin, îro li ser bingeha berjewendiyên gel û baweriyan bê nûkirin. Bêguman divê bîra dîrokî ya Elewiyan û fikarên ku ji ber vê yekê derketine holê bi ciddî werin dîtin. Armanc ne helandina Elewîtiyê di nav Sunîtiyê de ye; armanc ew e ku Kurd û Elewî bi nasname û xweseriya xwe bibin hêza avaker a vê hevpeymaniya nû ya demokratîk. Ya berbehs, ne hevpeymaniya mîran, hevpeymaniya gelan e. Armanc ne hevpeymaniya serdestiyê, ya wekhevî û azadiyê ye. Ronesansa Elewiyan jî ji stûnên herî girîng ên vê paşeroja hevpar û demokratîk e.”
Her wiha beşek ji nirxandinên Rêber Apo yên li ser geşedanên li Rojava jî hat parvekirin. Hate diyarkirin ku Rêber Apo rûdanên li Rojava wekî “provokasyoneke eşkere” bi nav kiriye. Hate ragihandin ku Ocalan hişyariya, “Hûn ê ciwanekî bi hovîtî bikujin û paşê vê bikin hinceta têketina bajêr. Ev provokasyoneke eşkere ye. Divê ev sabotaja li dijî zemîna diyalogê yekser bê rawestandin” daye.
Nirxandinên Rêber Apo yên li ser bûyerên li Îranê jî hatin parvekirin. Hate gotin ku Rêber Apo polîtîkaya Partiya Jiyana Azad a Kurdistanê (PJAK) rast dîtiye û destnîşan kiriye ku stratejiya parastina gel bêyî ku bikeve bin bandora aliyên din, di cih de ye. Hat destnîşankirin ku Rêber Apo diyar kiriye ku divê tavilê darvekirinên li Îranê bên rawestandin Îranê û dev ji êrîşên li ser herêma Kurdan berde û gotiye: “Eger ev neyê kirin, wê mafê parastina rewa ya Kurdan hebe. Divê Tirkiye di vê mijarê de rolek erênî bilîze.”
Hate destnîşankirin ku Rêber Apo ji bo Mehdî Zana yê ku çendek bere jiyana xwe ji dest dabû jî peyamek şandiye. Rêber Apo di peyama xwe de xemgîniya xwe ya ji ber koça dawî ya Zana anî ziman û got: “Di rêya îradebûna gel a li ser bingeha demokrasiya xwecîhî de kedeke wî ya mezin hebû. Ez di serî de ji Leyla Zana re û ji bo hemû malbata wî sersaxiyê dixwazim.”
