Wezareta Karên Derve ya Îsraîlê roja Çarşemê daxuyaniyek da û ragihand ku welatê wan bi rengekî sektorî beşdarî Forûma Giravên Pasîfîkê bûye. Di daxuyaniyê de hate gotin, hevkarî wê bi giranî li ser mijarên rêvebirina avê, paqijkirina ava deryayê, çandinî, ahengiya bi guherîna avhewayê, înovasyon û pêşveçûna domdarî bisekine.
Forûma Giravên Pasîfîk a ji 18 endaman, ji ber hewldanên Çînê yên ji bo zêdekirina bandora xwe ya li herêmê, di serî de Dewletên Yekbûyî yên Emerîka (DYE) û Awûstralyayê ji bo hêzên mezin weke platformeke dîplomatîk a girîng tê dîtin. DYE, Çîn, Fransa û Îngilistan jî di nav de 30 şirîkên pêşvebirinê yên Forûmê hene.
ÎSRAÎL TÊKILIYÊN XWE YÊN DÎPLOMATÎK ÊN LI PASÎFÎKÊ BERFIREH DIKE
Tevlîbûna Îsraîlê ya li forûmê di demeke welê de pêk hat ku welat hewl dide têkiliyên xwe yên bi welatên Pasîfîkê re xurt bike. Nauruyê meha Îlonê li Qûdsê sefaretxaneya xwe ya bilind vekir û bû yek ji kêmwelatan ku piştgiriyê dide hewldanên Îsraîlê yên ji bo vekirina nûnertiyên dîplomatîk li vî bajarî.
Ji endamên forûmê Papua Nû Gîne û Fîjiyê jî li Qûdsê sefaretxaneyên xwe yên bilind vekirine. Tê payin ku Samoa jî îsal heman gavê biavêje.
Îsraîl Qûdsê weke paytexta xwe ya nayê parçekirin dibîne. Lê belê ev statu ji aliyê beşeke mezin a civaka navneteweyî ve nayê naskirin. DYE jî di nav de hejmareke kêm a welatan piştgiriyê didin vê helwesta Îsraîlê.
Forûma Giravên Pasîfîkê hîn bersiv nedaye daxwaza daxuyaniyê ya Îsraîlê ya li ser şirîkatiyê.
