Şervanên Lîwaya Qamişloyê Xebat Efrîn (Mihemed Osman) 26’ê vê Cotmehê dema li ser erka xwe bû li bajarê Qamişloyê û Tolhildan (Îshaq Hisên) 26’ê Cotmehê li Kobanê, şehîd bûn îro bi merasîmekê li Pakrewangeha Şehîd Delîl Saroxan hatin veşartin.
Merasîm ji aliyê Meclisa Malbatên Şehîdan a Qamişloyê ve bi amadebûna bi dehan kesî hat lidarxistin.
Piştî deqeyeke rêzgirtinê, li ser navê malbatên şehîdan Hisên Kesîr sersaxî da malbatên her du şehîdan û amaje bi fedakariyên mezin ên ku şehîdan di oxira parastina gelê xwe de dane, kir.
Kesîr bi nûkirina soza şopandina rêça şehîdan axaftina xwe bi dawî kir.
Fermandarê Lîwaya Qamişloyê, Hisên Qamişlo dilsoziya bi şehîdan re anî ziman û got hêzên wan amade ne li dijî tevahî êrişên li ser ewlehiya herêmê û îstîqrara wê bisekinin û destkeftiyên şehîdan biparêzin.
Hisên behsa planên li dijî aramiya herêmê jî kir û bang kir ku nekevin xefka weşanên rûpel û malperên hewl didin fitneyan derxin.
Piştî axaftinan wesîqeyên şehîdan hatin xwendin û radestî malbatên wan hatin kirin.
Cenazeyên herdu şehîdan bi dirûşmên “Şehîd namirin” hatin veşartin.
